Хуучны нэг кинон дээр “Машин ирж явна. Лав шалгалтын улс бололтой. Шинэ халаадаа өмсөөрэй, ширээний бүтээлгээ солиорой” гэж уулгамчилдаг. Ажлын чанараараа жаахан сулавтар сум нэгдлийнхнийг шүүмжилсэн бүтээл л дээ. Түүн шиг төрийн албанд сонгогдон өчнөөн хугацаа өнгөрсний дараа гэнэт л сонгуулийн жил гарч сонголтыг хугацаа ойртонгуут хөдөөгүүр эг маггүй давхицгааж элдэв шагнал урамшууллыг аадар бороо лугаа асгацгаан, Энх-Амгалан бурхны дүрээр залран энд тэнд ишиг хурга хүртэл барьж аван үнсээд сүйд.

Товчхондоо одоо л манай улс орон тэдний гаргаж буй ааш аягаар бол сэтгэл зүтгэлийг хүчээр сэвхийтэл босоод ирэх бололтой. Улс төрийн хүрээнд намуудад нэр дэвшихийн төлөөх уралдаан шинэ хуучин сонирхогчдын дунд ширүүсэж 3 сая хүн амтай Монголд 300 гишүүн ч багадахаар юм болцгоох. Бүгд л нэр дэвшихийн төлөөх үйлсэд ханцуй шамлан орцгоож квотыг наймаа ч ид цэцэглэж, жижиг намууд тоогдчих гээд том том юм ярих.

Үнэндээ санал хуваангаа ашиг хувь хүртчих санаатай л. Сонгуулийн жил зудын нохой шиг зооглоод сурчихсан түүгээрээ дөрвөн жилийн турш амьжиргаагаа залгуулдаг амташсан хэсэг ч байдаг.

Тойрог томсгож, төрд залрах эрхмүүдийн тоо нэмэгдсэн болохоор манай чинээлэг хэсгийнхний улс төрийн дон шүглэсэн хэрэг л дээ. Борооны дараах мөөг шиг энэ олон улс төрчдөөс чухам хэн нь улс орны бодлогыг шинэчлэн зангидаж, авлигалчдын эсрэг шударга хуулийн дагуу ажиллаж, хувийн эрх ашгаа хойш тавьж чадахаа харуулах вэ гэх асуулт хариултаа хүлээнэ. Үнэндээ талаас илүү хувь нь төрийн эрх мэдлийг бизнесийн амжилтаа ахиулах бололцоо гэж хардаг гаж тогтолцоо бий болсныг нуух аргагүй. Үүнийг өөрчлөх үү. Яаж ?

Д.ЭНХБАТ