Сонгуулийн солиорол дуу дуугаа авалцан газар бүр идэвхжиж, улс төрчдийн худал хуурмаг дүр сэрцгээж байна. Тэд бүхнийг чадагч, орчлонг нигүүлсэгчийн дүрд амжилтай хувиран ард түмэнд хайр зарлана. Нийгмийн давхраажилтын чинээлэг хэсгийнхэн эгэл бор ард түмний аж амьдралыг сайжруулагч гэгээн ид шидтэн болох нь халаг гийналдах. Зарим эрх мэдэлтнүүд нь олны танилуудаар өөрийгөө улаан цайм хий магтуулж оноо цуглуулахаар ядах бөгөөд харин зарим хуучин бүлэглэлийн тод дүрүүд гэмгүйгээ нотлох их аянд мордож, энд тэнд эрээвэр хураавруудын элдэв балай үгсийг цуглуулж хэлхэн ядах. Эх орноо хэт өндөр сэнтийгээс эсвэл харийн газраас элдвээр даажигнах эрхийг шинэ, хуучин бохир улс төрчдөд хэн ч олгоогүй. Улс төрийн тохироо үндсэн хуулийг ч амны алчуур шиг болгож, улс нийтээрээ жорлонгийн ялаа шиг дүнгэнэлдэхээс хэтрэхгүй сул дорой, даржин ядуу нийгмийг тохуурхана.

Хүн амын ихэнх нь хүчиллэг, хүнд металлын хордлогод орж, хүүхэд багачууд уушгины багтраатай, элдэв суурь өвчтэй өсөх аймшигт хараалын нийгмийг бүтээжээ. Таван хошуу малынхаа шимээр тэртээгээс эдүгээ хүртэл эрүүл саруул, элэг бүтэн оршсоор ирсэн Монголчуудад уул уурхайн баялгаасаа болж зовж зүдрэх сонголт л үлдлээ гэж үү.

Сонгууль дөхөхөд улс төрчид, эрх мэдэлтнүүд, олигархи баячууд ард түмний тархийг угаахын тулд дөрвөн жилд нэг удаа хөдөлгөөнд орох ба бусад цагт дулаан орныг онгоцоор зорьж, дуулгавартай манкурт борлуулдгаараа түмний чөмгийг ховх сордог ужид бурангуй цаг үеийг бид туулж байна. Бүгд тайлагдахааргүй авлигал хулгайн гинжин хүлээсэнд тийчилцгээн гаднын улсын бүтээн байгуулалтыг Монгол залуус үмх хоол, өмсөх хувцасны төлөө зорьж очиж бүтээж өгч байна. Эх орон нь эзгүй, элдэв самуурагчдын хөлд дарагджээ.

Д.ЭНХБАТ