Эдийн засгийн өсөлт энэ онд 8,4 хувьд хүрч, гадаад валютын нөөц 250 сая ам доллар, инфляц 7 хувь болсон эерэг мэдээ байгаа ч өрхийн орлого зарлагын бодит үзүүлэлтүүд сайжраагүй байна. Орлогоосоо давсан өрийн сүлжээнд орооцолдсон эдийн засгаа хөөрцөглөж хөнгөмсөг бус үнэнээр нь тооцоолон хуваарилах шийдэл дутагдлаар байна. Энэ онд авилгалыг бууруулж, уул уурхайн ашиг сайжирч гэмээ нь гарсан хонгилын үзүүрийн гэрэл шиг бага зэргийн өсөлтүүдээ хэрхэн хадгалах вэ гэдэгт бодлогын шаламгайлал шаардлагатай.

Нүүрс, зэс, алтаа түүхийгээр нь зарж олсон багахан ашигт тайвширцгааж улс төрийн алмайрал, цалгардалтаа үргэлжлүүлэх аваас юу ч өөрчлөгдөхгүй, бахь байдгаараа санхүүгийн дарамттай, бүх зүйлээрээ гаднаас хараат байх магадлал өндөртэй.

Эдийн засаг дахь суурь шинжтэй хоёр гуравхан эерэг үзүүлэлт нь хэн нэг сайд эсвэл аль нэг намын популист улс төрийн мэдэгдлийн сэдэв биш бөгөөд төсвийн бодлого хэр оновчтой хэрэгжих вэ гэдгээс үр дүн гарах юм.

Асар их авлигал, хязгааргүй шуналын хар ангал руу урссан олон их наядаар хэмжигдэх нийтийн баялгийн үр өгөөжийг хэзээ байх ёстой газарт нь буцаах вэ. 60 тэрбум, ЖДҮ, нүүрс, ногоон автобус гэх мэтээр авлигалын тодорхой нэр хаягтай хэргүүд бохир улс төрийн тохиргоотой хамт газрын гаваар орж хулгайн тогтолцоог боловсронгуй болгогчид төр самрах үйлсэд хүчин зүтгэсээр байвал асуудал хэзээ ч шийдэгдэхгүй.

Д.ЭНХБАТ