Социализмын үеийн хариуцлагагүй байдлыг ёгтоор шүүмжилсэн “Ховор хүмүүс” МУСК-нд албан конторын цонхоор холоос ирж буй машиныг дурандаад “... машин ирлээ, шинэ халадаа өмсөөрэй, ширээнийхээ бүтээлгийг солиорой” гэж хашгирдаг. Шалгалтад зориулж л өмсдөг шинэ халат, ширээний цэвэрхэн бүтээлэгтэй байсан хэрэг.

“Үндэсний баялгийн сан, өрийн дарамтгүйдэл, шинэ хоршоо, шилдэг үйлдвэрлэл…” хэмээн эрх баригч намын эрх мэдэлтэй дарга нар өдөр бүр зурагтаар зүсэн зүйлийн дүр байдал үзүүлэн сандралдах нь чухам дээрх киног санагдуулна. Тэдэнд хуучин нийгмийнх шиг шалгалт шүүлэг хамааралгүй ч ард түмний үнэлэмжээр сонгуульд өрсөлддөг ардчилсан нийгмийн ололт амжилт асарсаад болж буй нь тэр. Харамсалтай нь энэ бачуурлаас үүдэн уул уурхайгаас олддог жаалхан мөнгө, улсын төсөв өмнө нь байгаагүйгээр хямрах болжээ. Учир болвоос өнөөх эрх баригчдын гэнэтийн сандрал ард түмэнд цочирдом мөнгөний сураг дуулгах амлалт хөтөлбөр гэгчээр хуй салхи шиг эргэлдэн бодлого төлөвлөлтгүй асар олон их наяд төгрөг өр зээлийн шуурган болж дэгдэхээр боллоо. Эдийн засагт эрсдэл, сорилтыг ядаж жил сараар нь тооцохгүй л бол бүрэн сүйрэлд хөтөлдөг. Гэтэл төрийн эрх мэдэлд залрагчид сонгуулийн сураг дуулдангуут гэнэт ард түмэндээ хайр зарлан асар их мөнгө бэлэн тараагаад зогсохгүй ар араас нь цувуулан зээл, тусламж, хөдөлгөөн, хөтөлбөр гэх мэтээр гоё нэрлэн цацаж гарлаа. Мөрийн хөтөлбөрөө хэрэгжүүлэхэд бус эрх мэдэл албан тушаал эд хөрөнгийн хойноос хувийн эрх ашигтаа хэт зулгуйдсан балаг нь ийнхүү төсвийн шуудайг сэгсрэх бахардалтаар үргэлжиллээ.