Үндсэн хуулийн өөрчлөлтөөр бүрдэх УИХ тооны хувьд олуулаа болж байгаа болохоор улс төр, нийгмийн шинэ хандлагаар ажиллахаас өөр аргагүй. Эх оронч сэтгэлгээг хамгийн их уриалагчдын хувьд аль аль намаас тэргүүлэгч улс төрчид хангалттай орж ирсэн учир энэ удаад ямар нэг харанхуй, аюултай МАНАН бус улс орны нийтлэг эрх ашгийг хүндэтгэн үздэг төрийн түшээд болж түүхэнд үлдэх боломж байна. Улс төрийн замналын хувьд шинэ хуучин аль аль талуудад төлөөлөлтэй болжээ. Хамтарсан засаг байгуулагдах эсэх нь тодорхойгүй хэдий ч сошиал орчны нөлөөллөөс ажиглахад эрх ашгийн үйлчлэлээ хадгалах улс төрийн бүлэглэл хоорондын толхилцоон хэвээрээ байгаа.

Монголын ард түмэнд илтэд мэдрэгдэхгүй ч авлигал ашиг сонирхлыг болоод эв нэгдэлгүй байдлыг турхирагчид, зарим талаараа явцуу ч дүн нуруугаараа улс орны цаашдын хувь заяанд төдийлөн том гай болохгүй тусгаар тогтнолын төлөө ядаж нэгдэцгээдэг бүлэглэл хоорондын өрсөлдөөн сонгууль дууссан хойно ч өрсөлдөж байна.

Энэ бүхний эцэст улс орныхоо эрх ашгийг хувь хүний жижиг явцуу эрх ашгаасаа дээгүүрт тавьж чадах хүмүүс эвлэлдвэл шинэ тогтолцооны хувьд эерэг үр дүн гарах магадлал бий. Гэвч парламентын гишүүд олон боллоо гээд алаг цоог эрх мэдэл, эд хөрөнгийн төлөөх хулгайн угшилтай улс төрөөс ангижирч чадахгүй бол Үндэсний аюулгүй байдал улам эмзэгших бололтой.