Шинээр сонгогдсон 126 УИХ-ын гишүүн өчигдөр “Монгол Улсын Их Хурлын гишүүн би ард түмнийхээ элчийн хувьд нийт иргэн, улсын ашиг сонирхлыг эрхэмлэн, төрт ёс, түүх соёлынхоо уламжлалыг хүндэтгэж, Монгол Улсын Үндсэн хуулийг дээдлэн сахиж авлига ашиг сонирхлоос ангид байж, гишүүний үүргээ чин шударгаар биелүүлэхээ тангараглая. Миний бие энэхүү тангаргаасаа няцвал хуулийн хариуцлага хүлээнэ” хэмээн төрийн сүлдэнд тангараг өргөлөө.

Энэ удаагийн УИХ-ын гишүүдийг 60 гаруй хувь нь өмнө нь парламентад сууж байгаагүй шинэ гишүүд. “...Тангаргаасаа няцвал хуулийн хариуцлага хүлээнэ” гэсэн өгүүлбэр ард түмэнд итгэл төрүүлэхүйц ч чухам ямар хариуцлага хүлээх вэ? Монгол Улсын их хурлын тухай хуулийн шинэчилсэн найруулга төсөлд 9.3.Монгол Улсын Үндсэн хуулийн цэц гишүүнийг тангаргаасаа няцаж Монгол Улсын Үндсэн хууль зөрчсөн гэсэн дүгнэлт гаргасныг Улсын Их Хурал хүлээн зөвшөөрсөн бол түүнийг эгүүлэн татах эсэх асуудлыг Улсын Их Хурал хэлэлцэн шийдвэрлэнэ. Хэмээн заажээ.

Мөн гишүүн Ерөнхийлөгчөөр сонгогдох, шүүхээр гэм буруутай нь тогтоогдсон, өвчний улсаас зэрэг шалтгаанаар эгүүлэн татагдана. Их хурлын гишүүдийн төр, ард түмэндээ өргөдөг тангараг нь тунхгийг шинжтэй байгааг үүнээс харж болно.

Эрх зүйн ойлголтоор тангаргийг хууль зүйлтэй холбон авч үзээд шууд эрүү үүсгэдэг тогтолцоо ч бий. Цэрэг хүн өргөсөн тангаргаасаа няцвал эх орноосоо урвасанд тооцож шүүх шийдвэл шууд эрүүгийн ялтан болно. Харин УИХ-ын гишүүд тангараг өргөөд элдэв гэмт хэрэгт холбогдож улс эх орны эрх ашиг зөрчигдсөн нь тогтоогдвол хариуцлагад татагдах үйл явцыг чангатгах шаардлага бий.