Ням гарагт болсон сонгуулийн дараа хувь заяа нь дээсэн дөрөөн дээр байгаа Венесуэлийн ерөнхийлөгч Николас Мадуро өчигдөр “шинэ хувьсгал” эхлүүлэх тухай ярьжээ.

Сонгуулийн үр дүнг луйвардсанд Венесуэлийн ард иргэд түүнийг буруутгаж, эрх мэдлээ сөрөг хүчний нэр дэвшигчид шилжүүлэхийг шаардаж байгаа.

АНУ тэргүүтэй Өрнөдийн орнууд болон Латин Америкийн хэд хэдэн улс Мадурогийн ялалтыг хүлээн зөвшөөрөхөөс татгалзсан юм.

Лхагва гарагт гадаадын сэтгүүлчидтэй Каракас хотод уулзахдаа Мадуро “Уго Чавесын тодорхойлсон замыг үргэлжлүүлэх хүсэлтэй хүнийхээ хувьд би дахин хувьсгал хийх бодолгүй байна. Гэхдээ Умард Америкийн империалистууд, фашист гэмт хэрэгтнүүд намайг хүчилбэл би ард түмнийг шинэ хувьсгалд уриалан дуудахаас буцахгүй” гэж мэдэгджээ.

Энэ мэдэгдлээс хэдхэн цагийн өмнө АНУ-ын үндэсний аюулгүй байдлын зөвлөлийн хэвлэлийн төлөөлөгч Жон Кирби сонгуулийн бодит үр дүнг ил тод зарлахыг Мадурод уриалсан юм.

“Бидний болон олон улсын хамтын нийгэмлэгийн тэвчээр барагдахаас өмнө Венесуэлийн эрх баригчид энэ сонгуулийн бодит үр дүнгийн нарийвчилсан мэдээллийг бүрэн бүтнээр нь нийтэд ил болгохыг хүлээж байна” гэж Кирби өчигдөр Цагаан ордонд сэтгүүлчидтэй уулзах үеэрээ хэлсэн байна.

Сонгуулийн дараа дэгдсэн иргэдийн бослого тэмцлийн үеэр хууль хүчнийхний гарт 20 хүн алагдсаныг батлах баримт цуглуулснаа Human Rights Watch байгууллагын Америкийн салбарын захирал Хуанита Гобертус өчигдөр мэдээлжээ.

Венесуэлийн төрийн бус байгууллага Foro Penal тэмцлийн эхний өдөр буюу Даваа гарагт 11 хүн алагдсан тухай мэдээлж байсан юм.

Каракасын эрх баригчид одоогоор энгийн иргэдийн амь нас үрэгдсэн талаар ямар нэг тоо баримт зарлаагүй байна.

Эх сурвалж: CNN

ikon.mn