Ерөнхий Сайд асан, МАН-ын дарга, УИХ-ын гишүүн Л.Оюун-Эрдэнэ сэтгүүлчдийн асуултад хариулав.

Энэ үеэрээ тэрээр: " МАН-ын даргын төлөөх өрсөлдөөн ийм зөрчилдөөнд хүрсэнд иргэдээсээ уучлалт хүсье. Миний хүүгийн асуудал АТГ-т шалгагдаад дүгнэлт нь гарсан. Даан ч наадам энэ тэр гээд хүмүүс анзаараагүй. Нэг цүнх, нэг бөгж авсан нь үнэн. Ийм асуудлаар албан тушаалтнуудыг шалгавал юу болох юм мэдэхгүй, би "Хэро энтертайнмент"-ын өдөр тутмын үйл ажиллагаанд оролцдоггүй. Уг нь бол бидний хувьд ард түмэндээ амласан мөрийн хөтөлбөрөө л биелүүлэх ёстой.

Цаашдаа нам маань эвлэлдэн нэгдээд учраа олоод явах ёстой.

Харбины гэрээний тухай яриа худлаа. Хоёр тал энэ гэрээг гуравдагч талд үзүүлэхдээ нэг нэгнээсээ зөвшөөрөл авна гэсэн заалттай. Засгийн Газар БНХАУ руу хүсэлт явуулаад л үзчихэж болно. Хэрвээ энэ буруу гэж үзэж байгаа бол Засгийн Газар цуцалж, шинээр хийж болно. Би Д.Амарбаясгалангийн талаар гадаадын хэвлэлд мөнгө төлж харлуулаагүй. Энэ мэдээлэл худал. Яах гэж гал барьж, олон хүнийг гомдоож ийм олон ажил хийв дээ гэж бодогдож байна. “Mongol Khan” жүжигт би нэг ч төгрөг өгч байгаагүй, харин гай л болж байсан.

Би ажлаа өгчихөөд АНУ яваагүй, Индонези яваагүй, миний гэр бүл Англид огт амьдарч байгаагүй.

Цэцийн дүгнэлт парламентын эрхэнд халдсан. Цаашдаа УИХ Засгийн Газарт хариуцлага тооцож чадах уу? үгүй юу гэдэг асуудал үүсч байна. Намайг Ерөнхий сайд 16 их наядын алдагдал гарсан гээд байгаа нь Монгол Улсын нийт алдагдал. Би асуудлаа илүү урт хугацаагаар хараасай гэж боддог. Иймээс ч Шинэ Сэргэлтийн бодлогыг санаачилсан. Би МАН-ын даргын ажлаа өгчихөөд УИХ-ын гишүүнийхээ ажлыг үнэнч шударгаар хийнэ, хэвлэлд дэлгэрэнгүй яриа өгнө.Гадаадад Монголыг сурталчилахад яг хэдэн төгрөг зарцуулсаныг сайн мэдэхгүй байна.

Ер нь бол Ерөнхий Сайд чинь хурал удирддаг хүн шүү дээ. Бүх яамдууд өөр өөрийн ажилтай.

Хурлын зохион байгуулалтын хэлбэрээр хуралдахыг л Засгийн Газар хуралдана гэдэг. Яамдуудын санал нийлвэл Ерөнхий сайд шууд алх цохьдог. Би бол ихэнхдээ хэлэлцэх ч үгүй алх цохьдог байсан. Ер нь бол нэг гал барьж, томоохон ажлуудыг яах гэж хийв дээ гэж бодогддог юм байна шүү. Зүгээр л байж байдаг байж. Олон хүнийг гомдоосон нь зөв ч байсан юм уу? буруу ч байсан юм уу? гэж бас бодогддог юм. Гал аваад том том сэдэвтэй тулж явах бол хувь хүний хувьд ядаргаатай юм байна лээ. Ийм хүмүүс гарч ирэхгүй мохоо болчих вий дээ. " гэлээ.

Н.Отгончимэг