Германы Bild сонины цэргийн шинжээч Юлиан Рёпке арваннэгдүгээр сарын 16-нд "Украин арваннэгдүгээр сард энэ жилийн хувьд газар нутгаа үлэмж хэмжээгээр алдах магадлалтай байгаа бөгөөд Днепр, Запорожье зэрэг томоохон хотуудын ойролцоо Оросын армийн давшилт ойрын хэдэн сарын, түүгээр ч зогсохгүй 1-2 жилийн дотор бодит заналхийлэл болж хувирч мэднэ" гэж мэдэгджээ.

Түүний хэлснээр, Украины Засгийн газар болон барууны түншүүд стратегиа өөрчлөхгүй бол ОХУ дайнд аажмаар давуу тал олсоор, улмаар ялах магадлал нэмэгдэж байгаа аж.

Рёпке ялангуяа оптик шилэн холбооны системийн салбарт Оросын давамгайлал өсөн нэмэгдэж буй энэ үед баруунаас нийлүүлж буй хуягт техникүүдийн үр ашиг буурч, бодит нөхцөлд нөлөө багатай болж байна гэж тайлбарлажээ.

Тэрбээр мөн дезертирлэл болон украин цэргийн алба тасалдсанаас шалтгаалан Украины Зэвсэгт хүчний зарим бригадууд бодит байдал дээр байхгүй, зөвхөн цаасан дээр бүртгэлтэй хэвээр байдаг бөгөөд сар бүр дайчлагдаж буй 17 мянган хүний яг хаана байрлаж буй нь тодорхойгүй хэвээр байгааг сануулсан байна.

Оросын цэргүүдийн хувьд Украины газар нутгийг эзлэх хурд эрс нэмэгдэж буйг Telegram-ын “Агентство. Новости” суваг мөн мэдээлжээ. Тус суваг Украины OSINT төсөл DeepState-ийг иш татан, арваннэгдүгээр сарын 10-наас 14-ний хооронд буюу долоо хоногоос бага хугацаанд Оросын армийн хяналтад нийт 134 км² газар орсон нь аравдугаар сарын үзүүлэлтээс хоёр дахин их болохыг тэмдэглэжээ.

Энэ хугацаанд өмнөд фронт буюу Запорожье, Херсон, Днепропетровск чиглэлд 72 км² газар, Покровск орчимд 42 км², Харьковын зүүн хэсэгт 19 км² газар Оросын хяналтад шилжсэн байна.

АНУ-ын Дайн судлалын хүрээлэн (ISW) Покровск орчмын нөхцөл байдал ийм хэмжээнд хүрэхэд Оросын олон сарын турш үргэлжлүүлсэн, Украины талын ойролцоох логистикийг дроноор устгах ажиллагаа гол нөлөө үзүүлсэн гэж үзжээ.

Үүнээс гадна фронтын дагуух Оросын ахиц, ялангуяа Покровск болон Гуляйполийн чиглэлд цаг агаарын нөхцөл тааруу, манан, хур тунадастай байгаа нь давуу тал бий болгосон болохыг тус байгууллага арваннэгдүгээр сарын 15-ны тайландаа онцолсон байна.

Эх сурвалж: DW
Б.ЖАРГАЛ