Нүүрсний нөөцөөр баялаг Өвөр Монголд өнгөрсөн онд нийт 22 нүүрсний уурхайг хааж, нүүрс олборлолтыг жилд 11.1 сая тонн болтол бууруулсан гэж Регнум агентлаг мэдээллээ.

Хаагдсан уурхайнууд бүгд жижиг уурхай байсан бөгөөд ашиг багатай, харьцангуй хуучирсан тоног төхөөрөмж ашигладаг байсан гэнэ. Эдгээрийг хааснаар бүс нутгийн нүүрсний салбарыг сайжруулах, орчин үеийн шаардлагад нийцүүлэх боломж гарна гэж орон нутгийн захиргаанаас мэдээлжээ.

Түүнчлэн нүүрсний салбарын үр ашиг, экологийн нөхцөл байдлыг хангах үүднээс нүүрс олборлох салбарт технологийн шинэчлэл хийх, инноваци нэвтрүүлэх ажлуудыг эрчимжүүлсэн байна.

2018 онд Өвөр Монголд 926 сая тонн нүүрс олборлосон нь Хятадад олборлогдсон нийт нүүрсний дөрөвний нэг хувийг эзлэж байгаа юм. Улмаар илүүдэл, хуучирсан хүчин чадлыг цомхотгохын тулд ган цутгамлын хоёр үйлдвэр, 118Мвт хүчин чадалтай, хэд хэдэн нүүрсний цахилгаан станцыг хаажээ. Мөн жилд 2.8 тнн эзлэхүүнтэй, хуучирсан хүчин чадал бүхий ган, электролит хөнгөн цагааны үйлдвэрүүдийг мөн хаасан байна.

Энд дуулгахад, энэ оны хоёрдугаар сарын дундуур Хятадын хойд хэсэг дэх Шаньси мужид 36 нүүрсний уурхайг хааж, олборлолтыг 23.3 сая тонноор бууруулсан юм. Өвөр Монгол болон Шаньси мужид ийнхүү ашиг багатай уурхайнуудыг хааж байгаа нь экологийн цэвэр үйлдвэрлэлийг хөгжүүлэх, нүүрсний эрчим хүчийг цэвэр хийн эрчим хүчээр солих Хятадын бодлогын дагуу хийгдэж буй ажлууд юм.

Б.АНАНД