Нийслэлийн Баянзүрх дүүргийн 26 дугаар хороонд байрлах Сингапур-Монголын хамтарсан “Singapore school of Mongolia” /SSM/ сургуульд дөрөвдүгээр сарын 5-нд хоолны хордлогын дэгдэлт гарсан талаар бид өмнө нь мэдээлсэн.

Халдварт өвчин судлалын үндэсний төвөөс НМХГ-т 2019 оны дөрөвдүгээр сарын 5-ны өдрийн 10:00 цагт Баянзүрх дүүргийн 26 дугаар хороонд байрлах Сингапур Монголын хамтарсан сургуульд сурдаг найман хүүхэд хоолны хордлогын шинж тэмдэг илэрсэн талаар хамгийн анх мэдээлэл өгсөн байдаг. Тэр өдөртөө Баянзүрх дүүргийн Мэргэжлийн хяналтын хэлтсээс хяналт шалгалтын баг томилогдож халдварын голомтод ажилласан.

2019 оны дөрөвдүгээр сарын наймны өдрийн мэдээгээр: "Эмнэл зүйн шинж тэмдэг илэрсэн 83, үүнээс халдвартад хэвтэн эмчлүүлсэн 43, хоёр хүүхэд сэхээнд биеийн байдал тогтвортой, гэрээр 39 хүүхэд эмчлүүлж байгаа. Нэг хүүхэд Сүхбаатар дүүргийн эмнэлэгт, нэг хүүхдийн онош үгүйсгэгдсэн. Өвчтөнүүдээс авсан шинжилгээгээр Shigella Flexner 1A үүсгэгч илэрсэн. Энэ нь голдуу бохирлогдсон хүнс, усаар дамжиж өвчлөл үүсгэдэг. Үйл ажиллагааг түр зогсоосон, хэрэглэж байсан уснаас гурван дээж, хоолноос 12, бүтээгдэхүүнээс 10, арчдас ес, агаар нэг, тахианы махнаас найман дээж нийт 43 дээж авч Улсын мэргэжлийн хяналтын газрын Хүнсний аюулгүй байдлын лавлагаа лаборатори болон Улсын мал эмнэлэг ариун цэврийн лабораторид шинжилгээ хийлгүүлэхээр хүргүүлсэн" байдаг.

Тухайн үед хоолны хордлого гарсны дараа "Хүчит Шонхор" худалдааны захаас авчирсан хоёр кг-аар савласан гурван ширхэг тахианы гуяны цул махнаас болсон байж болзошгүй" хэмээн олон нийтэд мэдэгдсэн байдаг. Шинжилгээний хариугаар тахианы мах болон ундны ус эрүүл ахуйн стандарт хангасан гэж гарчээ. ХӨСҮТ-ийн урьдчилсан шинжилгээгээр тогооч, бэлтгэгч хоёроос цусан суулга өвчин үүсгэгч илэрсэн байна. Өөрөөр хэлбэл цайны газрын бэлэн болсон бүтээгдэхүүн нянгаар бохирдож, хоолны хордлогын дэгдэлт үүссэн гэж үзэж байгаа аж.