Барилга, хот байгуулалтын сайд асан З.Баянсэлэнгэд холбогдох хэрэг жил дамнан үргэлжилж байна. Түүнийг Барилга, хот байгуулалтын сайдаар ажиллаж байхдаа албан тушаалаа урвуулан ашиглаж, "Түрээсийн орон сууц” хөтөлбөрөөс улсад онц их хэмжээний хохирол учруулсан хэргээр урьдчилан хорих 461-р ангид хорьсон.

Тодруулбал, Эрүүгийн хуулийн тусгай ангийн 263.2 дахь хэсэгт зааснаар албаны эрх мэдэл буюу албан тушаалын байдлаа урвуулан ашиглаж "Бэрэн групп" ХХК-ийн барьсан "Хангай" хотхоны орон сууцнаас 123 айлын орон сууцыг тендер зарлалгүйгээр худалдан авч, улсын төсөвт 972.4 сая төгрөгийн хохирол учруулсан байж болзошгүй хэмээн үзэж, хэргийг шалгаж байгаа юм. Анхан шатны болон давж заалдах шатны шүүхээс түүнд төрийн албанд ажиллах эрхийг гурван жилийн хугацаагаар хасч, улсад учруулсан 900 гаруй сая төгрөгийг төлүүлэх шийдвэр гаргасан ч Дээд шүүхээс хэргийг мөрдөн байцаалтад буцаасан байдаг.

Энэ талаар МАХН-ын Ерөнхий нарийн бичгийн дарга Э.Эрдэнэжамъянгаас зарим зүйлийг тодруулав.

Улс төрийн захиалгаар ажилладаг хууль, хүчнийхэнтэй тооцоо бодно

-Барилга хот байгуулалтын сайд асан З.Баянсэлэнгийг хорьсон асуудал юу болж байгаа бол?

-Үнэхээр инээдтэй юм болж байгаа. Энэ хэрэг нь Улсын Дээд шүүх хүртэл явчихсан байгаа. Юу гэж тогтоосон бэ гэхээр хохирол байхгүй байна гэсэн. Нэг ч хохирол байхгүй хэрэг дээр гэмт хэрэг үүсгэсэн. Өмнөх хуулиар бол хэрэгсэхгүй болгоод явуулдаг байсан. Одоо бол анхан шатны шүүх рүү буцаадаг болсон. З.Баянсэлэнгэд ямар ч хамааралгүй хэргээр хэрэг үүсгэчихсэн. Хууль, шүүхийнхэн шударга бус ажиллаж байна. "Шүүгчдийн тоо дөрөв биш гурав байх ёстой. Гурван шүүгчийн нэрийг тодорхой мэдэж шүүх хуралд ормоор байна" гэсний төлөө 40 хоног хорилоо. Ийм байж болохгүй. Прокурорын дүгнэлтэнд З.Баянсэлэнгийг хувьдаа нэг төгрөг авсан гэдэг баримт байхгүй байна. Шүүх хурал нь 28-нд товлогдсон. Одоо шүүх хурлаар З.Баянсэлэнгэ баталгаатай цагаадна. Яагаад гэвэл хохирол байхгүй. Нэг ч төгрөгийн авилга аваагүй. Тендерийн хууль зөрчөөгүй. Яагаад шоронд хийх гээд байна вэ гэхээр МАХН-ын хөтөлбөрт хүмүүс 10,20 мянгаараа бүртгүүлээд байгаа учраас эрх баригчдын хийж байгаа явуулга гэж харж байна. Тийм учраас хууль, хүчний байгууллагууд улс төрийн байдлаар ажиллахаа зогс. Улс төрийн захиалгаар ажилладаг хууль, хүчний байгууллагуудаа та нартай тооцоо бодно шүү.

-900 сая төгрөгийн хохирол учруулсан гэсэн. Энэ талаар?

-Авилгатай тэмцэх газраас 900 сая төгрөгийн хохирол учруулсан гэж яриад байхаар нь үнийн зөрүүнээс гарч ирсэн хохирол юм болов уу гэж бодсон. Гэтэл хамгийн инээдтэй нь тэр хохирлыгтооцохдоо банкуудтай харилцсан төлбөр тооцооны хэрэгслийг хохирол гээд үзчихсэн юм билээ. Тэр барилгуудтай нь ч хамаагүй. Барилгын компани нь ч аваагүй. Хэн ч аваагүй мөнгө.

-З.Баянсэлэнгийн хувьд эрх зүйн ямар нэгэн зөрчил байхгүй юу?

-Юу ч байхгүй. Харин ч З.Баянсэлэнгэ хийдгээ хийсэн. 1500 айл, өрхийг түрээсийн орон сууцанд оруулчихсан байна. Хоёр улсын хоорондын Засгийн газрын хэлэлцээрийг биелүүлсэн. Үүнээс өөрөөр яах юм.

Шүүгч нарт хууль ёсны шаардлага тавьж болохгүй болчихсон байна

-40 хоногийн хугацаанд хорьсон шалтгаан нь юу вэ?

-Шүүх, хүчний байгууллагыг улс төрийн захиалгаар ажиллаад байна гэж нилээн шүүмжилсэн. Шүүмжлэлийн магнайд нь хэн байгаа вэ гэхээр Ц.Элбэгдоржийн томилсон шүүгч Ц.Зориг. Бид нарын хамгийн олон жил шүүмжилсэн, огцрох ёстой гэж бодож байгаа ерөнхий шүүгчийн нагац дүү нь Баянсэлэнгийг шүүж байна. Гэхдээ илт буруу шийдвэр гаргаж байгаа юм. Гурван шүүгчтэй орох ёстой шүүх бүрэлдэхүүн дээр дөрвөн шүүгчийн нэр гаргасан. Аль нэгийг нь ядаж хасах ёстой. З.Баянсэлэнгийн зүгээс “Хасагдсан шийдвэр чинь хаана байгаа юм бэ, та дөрвийн хэнээр нь би шүүлгэх юм бэ” гэдэг зүй ёсны асуулт тавиад тэр нь тодорхойгүй байсан болохоор “Тэгвэл та нараас бүхэлд нь татгалзаж байна. Та нар хуулийн дагуу ажиллах ёстой. Тэгэхгүй бол зөв буруу гэдгийг би яаж мэдэх юм” гээд шаардлага тавимагц 40 хоногоор хорьчихсон. Тэр хүн оргон зугтах гээгүй. Мэдүүлэг өгөхгүй гээгүй. Зүгээр л өөрсдийнх нь буруу үйл ажиллагааг шүүмжилж, хууль ёсны шаардлага тавьсан болохоор хорьж байна. Шүүгч нарт хууль ёсны шаардлага тавьж болохгүй болчихсон байна. Гэмт хэрэг хийгээгүй байхад нь хүнийг шоронд хорьж болох уу. Өнөөдөр гэмт хэрэг хийснийг нь хүртэл хорьдоггүй биз дээ. Шүүхэд шаардлага тавьсныхаа төлөө шоронд орох ёстой юм уу. Энэ бол сонгуультай холбоотой.