-Монголоос хоёр автомашины захиалга очжээ-

Бүрэн цахилгаан хөдөлгүүртэй автомашин үйлдвэрлэгч “Тесла моторс” компани цоо шинэ загвартай пикап төрлийн “Cybertruck” автомашинаа Лос Анжелес хотод түрүү долоо хоногт танилцуулсан билээ. Танилцуулгын үеэр автомашины чанарыг харуулах үзүүлбэр амжилтгүй болж, шил нь хагарч байж. Уг машины уламжлалт бус хийц загварыг автомашины мэргэжилтнүүд шүүмжилж байснаас танилцуулгын дараа “Тесла” компанийн хувьцааны үнэ 6.1 хувиар унасан.

Хэдий тийм боловч “Cybertruck” нийтдээ 150 мянга гаруй захиалга хүлээж авсныг “Тесла” компанийн гүйцэтгэх захирал Илон Маск твиттер хуудсандаа мэдээлжээ. “Одоогоор нийт 146 мянган “Cybertruck”-ийн захиалга аваад байгаагаас 42 хувь нь хос, 41 хувь нь гурвалсан, 17 хувь нэг нэг хөдөлгүүртэй хувилбар сонгожээ” гэж тэр мэдэгдсэн.

Ямар ч сурталчилгаа явуулаагүй байхад ийм өндөр захиалга авсныг Маск онцолсон байна. “Cybertruck” автомашин 2021 оны сүүлээр Теслагийн үйлдвэрт угсрагдаж эхлэх төлөвлөгөөтэй байгаа юм” гэж “BBC” мэдээлсэн. Тэгвэл “Reuters” агентлагийн мэдээлсэнээр “Tesla” компанийн “Cybertruck” цахилгаан пикап автомашины захиалга 250 мянга орчим хүрсэн гэж тус компанийн тэргүүн Илон Маск “Твиттер” хуудсаараа дамжуулан мэдэгдсэн байна.

И.Маск твивттер хуудсаар дамжуулан “Cybertruck”-ийг сурталчилж байгаагийн зэрэгцээ захиалгын тоо болон бусад мэдээллийг өгч байгаа юм. Тэрээр “Пикап машины загвар сүүлийн 100 гаруй жил бараг өөрчлөгдсөнгүй. Одоо ямар загвартай пикап хэдэн онд үйлдвэрлэгдсэн гэдгийг хэлэхэд ч бэрх болж. Тиймээс бид ямар нэг шинэ зүйл санаачлах хэрэгтэй болсон. Тэгээд үүнийг бүтээлээ” хэмээн хэлсэн. Үнэхээр ч “Cybertruck” нь загварын хувьд маш шинэлэг болсон юм.

Дашрамд дурдахад, “Тесла” компанийн гурван жилийн өмнө худалдаанд гаргасан “Model-3” загвар эхний долоо хоногтоо 325 мянган ширхэг захиалга хүлээн авч байжээ. “Cybertruck”-ийг захиалагчдын дотор Монголоос хоёр ч захиалга өгөөд байгаа аж.