Жилдээ тэмдэглэдэг хамгийн гоё баярын нэг яах аргагүй шинэ жил гэдэгтэй маргах хүн цөөн биз. Харин хүсэн хүлээдэг энэ баяраа харуусал гуниг болгон хувиргахаас болгоомжлох хэрэгтэй. Хамгийн эхний жишээ гэхэд охид эмэгтэйчүүд шинэ жилийн арга хэмжээнд бэлдэж турах хүсэл зорилгоор олон хоногийн туршид шинжлэх ухааны батлагдаагүй эм бэлдмэл хэрэглэх, олон хоног мацаг барих зэргээс үүдэн эрүүл мэндээрээ хохирч байна. Тухайлбал, Баянзүрх дүүргийн нутагт амьдардаг 40 орчим насны эмэгтэй шинэ жилийн арга хэмжээний өмнө дөрвөн хоног огт хүнсний бүтээгдэхүүн хэрэглэхгүй мацаг барьснаас болж нас баржээ. Талийгаач бөөрний дутагдалтай байсан бөгөөд олон хоног мацаг барьснаар бөөрөнд нь муугаар нөлөөлж гэнэт биеийн байдал нь муудаж ухаан алдаж, эмнэлэгт очоод нас баржээ.

Амиа алдаагүй ч, богино хугацаанд хурдан тураана гэсэн тодотголтой, баталгаагүй эм бэлдмэл хэрэглэснээс эрүүл мэндээрээ хохирсон охид бүсгүйчүүдийн тоо шинэ жилийн үеэр эрс нэмэгддэг болсныг сүүлийн үед эрүүл мэндийн салбарынхан анхааруулсаар байгаа. Мөн шинэ жилийн баяр тэмдэглэж яваад осгосон, хөл гараа тайруулсан тохиолдол ч нэг бус гарч байна. Дээр нь шинэ жилийн баяраар хэрэглэдэг салютны асуудал байна. Хэдийгээр зориулалтын зөвшөөрөлтэй хоёр газарт салют зарж байгаа гэх боловч иргэд үнэ хямдыг бодож, баталгаагүй газраас хувь хүний гар дээрээс худалдаалан авч хэрэглэснээр эрүүл мэндээрээ хохирч, гараа тайруулахаас эхлээд нүүр амаа түлэх асуудал гардгийг мэргэжлийн байгууллагаас анхааруулж байна.