УИХ дахь МАН-ын бүлэг хаалттай хуралдсан. Хуралдаан завсарласны дараа УИХ дахь МАН-ын бүлгийн дарга Д.Тогтохсүрэн сэтгүүлчдийн асуултад хариулт өглөө.

-Бүлгийн хурлаар ямар асуудлыг хэлэлцсэн вэ?

- УИХ дахь МАН-ын бүлэг хуралдаж, завсарласан. УИХ-ын гишүүн Н.Номтойбаярын бүрэн эрхийг түдгэлзүүлэх тухай Улсын Ерөнхий прокуророос ирүүлсэн саналыг хэлэлцлээ. Улсын Ерөнхий прокурорыг оролцуулж асуултад хариулт авсан. Мөн УИХ-ын гишүүн Н.Номтойбаярын тайлбарыг сонслоо. Халдашгүй байдлын дэд хорооны хурлын саналыг бас сонссон. Бүлгийн эцсийн шийд гараагүй, түр завсарлаж байна. Одоо Халдашгүй байдлын дэд хороо хуралдаж санал дүгнэлтээ гаргана. Үүний дараа бүлэг дахин хуралдаж эцсийн шийдвэрээ гаргана.

-Эсрэг санал хэлж байгаа гишүүд байна уу?

-Мэдээж хүний асуудал учраас хүн бүр өөрсдийнхөө байр суурийг илэрхийлсэн. Эцсийн шийдвэр гараагүй байна.

-Н.Номтойбаяр гишүүн нотлох баримттай тайлбар өгч байна уу?

-Н.Номтойбаяр гишүүн нотлох баримттай тайлбараа өгсөн. Энэ асуудал нууцлалын зэрэглэлтэй асуудал. УЕП-оос УИХ-д өргөн барихдаа нууцын зэрэглэлтэй өргөн барьсан байна. Иймээс бүлэг хаалттай хуралдсан. Халдашгүй байдлын дэд хороо хаалттай хуралдаж байгаа.

-Хуулийн хугацаанд асуудлыг шийдвэрлэхгүй байна гэдэг асуудлыг зарим гишүүн хэлж байгаа. Энэ асуудал дээр бүлгийн даргын хувьд ямар байр суурьтай байна вэ?

-Халдашгүй байдлын дэд хорооны таван гишүүн бүгд байж санал хураана гэдэг шийдвэр гаргасан байсан. Ч.Улаан сайд өнөөдөр ирсэн. Иймээс халдашгүй байдлын дэд хороо хуралдахад бэлэн болсон байгаа. Бүлгийн хурал дээр олон талын мэдээллийг сонсчихсон. Иймээс Халдашгүй байдлын дэд хорооны хурал нэг удахгүй байх.

-Намаас ямар байр суурьтай вэ?

-Намын дарга байр сууриа илэрхийлсэн. Намын дарга Н.Номтойбаяр гишүүнийг өөрөө өргөдлөө өгөөд шалгуулчих гэсэн хүсэлтийг тавьсан.

-Н.Номтойбаяр ямар байр суурьтай байна вэ?

-Н.Номтойбаяр бодно гэдэг санал хэлсэн. Халдашгүй байдлын дэд хороон дээр ярилцана гэдгээ хэлсэн. Одоогоор эцсийн шийдвэр гараагүй байгаа учраас дэлгэрэнгүй мэдээлэл өгөх боломжгүй байна.