Эрүүл мэндийн яамнаас коронавирусийн талаарх ээлжит мэдээллээ танилцууллаа. 2020 оны хоёрдугаар сарын 21-ний 08 цагийн байдлаар шинэ коронавирусийн 75777 тохиолдол бүртгэгдсэнээс 2019 нь нас барсан байна. БНХАУ-аас гадна 27 улсад 1098 тохиолдол бүртгэгдсэн. Нас баралтын найман тохиолдол гарсан. БНХАУ-д шинэ тохиолдлын тоо багасаж байгаа ч Франц, Гонконг, Япон, БНСУ, Сингапур, Тайвань, Тайланд улсад шинэ коронавирусийн халдвар голомтлон гарч байгаа. Хятад улсад улсад зорчоогүй, батлагдсан тохиолдолтой хавьтал болоогүй хүнээс цаашаа халдвар тарсан тохиолдлын тоо нэмэгдэж байна. Ухань хотод урьд шөнө 201 хүн эдгэсэн. Сингапур, Япон, БНСУ-д өвчлөл нэмэгдсэн. Сүүлийн 24 цагийн байдлаар БНСУ-д гарсан тохиолдлын тоо гурав дахин нэмэгдсэн. Эдгээр тохиолдлын 17 нь эмнэлэгтэй, 67 нь сүмийн цуглаантай холбоотойгоор гарсан. Дэгү хотод 24 цагийн дотор 56 тохиолдол нэмэгдэж, 158 тохиолдол боллоо. Халдварын 80 хувь нь Дэгү хотод гарлаа. Хүн ам олноороо цуглах нь тархалтын гол шалтгаан болж байна. Солонгос улсад Сөүл, Дэгү, Чежү, Гуанжү, зургаан мужид коронавирусийн халдвар тархлаа. Монгол Улсын 48 мянган иргэн БНСУ-д ажиллаж амьдарч байгаа. Япон, Солонгос, Иран зэрэг өвчлөл гарсан 27 оронд зорчихгүй байх, зорчсон бол 14 хоног гэрээсээ гарахгүй байх шаардлагатай гэлээ.