Украины Ерөнхийлөгч Владимир Зеленский сэтгүүлчидтэй уулзах үеэрээ “Германы хэд хэдэн компани ОХУ руу зэвсэг үйлдвэрлэхэд ашигладаг тоног төхөөрөмжүүд нийлүүлж байна” хэмээн мэдэгдсэнийг "Интерфакс-Украина" агентлаг зургадугаар сарын 21-ний бямба гарагт мэдээлжээ.

Тэрбээр "Орос Холбооны Улс хэд хэдэн улсаас тоног төхөөрөмжүүд авч буй бөгөөд тэдгээрийг зэвсэг үйлдвэрлэлд ашиглаж байна. Тэд ойрын хугацаанд батлан хамгаалах салбартаа зориулж 860 нэмэлт тоног төхөөрөмж авахыг зорьж байна. Хамгийн гол нь Хятадын 52, Тайванийн 15, Германы 13, Чехийн 8, Өмнөд Солонгосын 6, Японы 3, Энэтхэгийн 3, АНУ-ын 1 компани тус тус маш бага хэмжээгээр тоног төхөөрөмж нийлүүлж байна" гэж хэлжээ.

Гэхдээ тэрбээр тэдгээр компаниудын нэрийг дурдаагүй байна. Гэсэн хэдий ч түүний хэлснээр Киевийн эрх баригчид энэ мэдээллийг нарийн мэдэж байгаа бөгөөд мэдээллийг Европын Холбоо зэрэг 26 улсын эрх баригчдад дамжуулсан аж. Украин эдгээр компанид хориг арга хэмжээ авах, мөн Орос дахь тоног төхөөрөмжүүдийг алсаас унтраах арга хэмжээ авахыг хүсэж буйгаа илэрхийлжээ.

Зеленский уг уулзалтын үеэр Украины зэвсэгт хүчин тусгай зориулалтын дрон-перехватчик буюу дрон сөнөөгч ашиглаж эхэлсэн талаар мэдээлсэн байна. Тэрбээр "Бид дрон сөнөөгч ашиглаж эхэлсэн. Үүнийг удаан хугацаанд ашиглаж ирсэн талаар та бүхэн мэдэх хэрэгтэй. Украинд дөрвөн компани энэ төрлийн төхөөрөмж үйлдвэрлэдэг. Тэдгээрээс хоёр нь маш амжилттай ажиллаж байна" гэж мэдэгджээ.

Украины Ерөнхийлөгчийн албан ёсны сайтад бичсэнээр, эдгээр дрон сөнөөгчийн үйлдвэрлэлийг Герман улс санхүүжүүлэхэд бэлэн байгаа бөгөөд энэ талаар Холбооны Канцлер Фридрих Мерцтэй тохиролцсон байна. Мөн Канад улс энэ үйлдвэрлэлд дэмжлэг үзүүлэхээр болсон талаар ч мэдээлжээ.

Эх сурвалж: DW
Б.ЖАРГАЛ