"АНУ-ын Ерөнхийлөгч Дональд Трамп Украинтай холбоотой зөрчлийг энхийн замаар шийдвэрлэх болон Оростой харилцаагаа сэргээхэд Киев саад болж байна гэж үздэг" хэмээн Францын "Le Point" сэтгүүл эх сурвалжийн мэдээллээс иш татан бичжээ.

"Трампын гол зорилт бол ОХУ-тай үр ашигтай харилцааг сэргээх явдал юм. Харин Украин түүний хувьд энэ зорилгод саад болж байна" гэж тус сэтгүүлд ярилцсан эх сурвалж онцолсон байна.

"Atlantic" сэтгүүл өчигдөр нэрээ нууцалсан албаны хүмүүсийн мэдээлэлд үндэслэн, АНУ-ын Ерөнхийлөгч Украин дахь зөрчилдөөнийг зохицуулахтай холбоотойгоор Владимир Зеленский болон Европын талын бодит бус шаардлагад сэтгэл дундуур байгаагаа илэрхийлсэн талаар мэдээлжээ.

Пүрэв гарагт Цагаан ордны хэвлэлийн төлөөлөгч Каролин Левитт мэдэгдэхдээ, Москва болон Киев одоогийн шатанд зөрчлийг зогсооход бэлэн бус байгааг Вашингтон ойлгож байна гэж хэлсэн байна. Мөн тэрбээр Трамп Украины нөхцөл байдлын талаар цаашид "нэмэлт мэдэгдэл" хийхээр төлөвлөж буйг онцолжээ.

Украины асуудлаарх хэлэлцээрүүд

ОХУ-ын Ерөнхийлөгч Владимир Путин болон АНУ-ын Ерөнхийлөгч Дональд Трамп нар 2025 оны наймдугаар сарын 15-нд АНУ-ын Анкориж хот дахь Элмендорф-Ричардсон цэргийн баазад уулзсан.

Хэлэлцээний дараа хоёр орны удирдагчид бодит үр дүнд хүрэх чин зориг болон олон салбарт хамтран ажиллахад бэлэн буйгаа илэрхийлсэн байна. Түүнчлэн тэд Украинд өрнөж буй зөрчлийг зогсоох чиглэлээр хамтран ажиллахад бэлэн байгаагаа нотолсон.

Дээд хэмжээний уулзалтын өмнө Украины Ерөнхийлөгч Владимир Зеленский газар нутгийн хувьд ямар ч буулт хийхгүй гэж мэдэгдсэн билээ.

Трамп Вашингтон хотод Владимир Зеленскийтэй наймдугаар сарын 18-нд хоёр талын уулзалт хийсэн. Удалгүй Европын хэд хэдэн орны удирдагчид хэлэлцээрт нэгдсэн бөгөөд тэд Украинд аюулгүй байдлын баталгааг хэрхэн олгох талаар АНУ-тай хамтран зөвлөлдсөн.

Дараагийн өдөр нь Цагаан ордны тэргүүн мэдэгдэхдээ, Франц, Герман болон Британи Украинд цэргүүдээ байрлуулах хүсэлтэй байгааг хэлээд, харин Америкийн цэргүүд тэнд байршихгүйг онцолсон билээ.

ОХУ-ын Гадаад хэргийн сайд Сергей Лавровын онцолсноор, Украинд аюулгүй байдлын баталгаа олгох асуудалд Москвагийн үндсэн ашиг сонирхлыг харгалзан үзсэн бүх талын зөвшилцөл (консенсус) байх ёстой.

Гадаад хэргийн яамнаас мэдэгдэхдээ, НАТО-гийн орнуудын цэргүүдийг Украинд байрлуулах ямар ч хувилбар ОХУ-ын хувьд туйлын хүлээн зөвшөөрөхгүй зүйл бөгөөд энэ нь хурцадмал байдлыг эрс нэмэгдүүлэх эрсдэлтэй гэж анхааруулжээ.

НАТО-гийн улс орнууд, тэр дундаа Их Британи болон Европын зарим орнууд Украинд цэргийн хүч байршуулж болзошгүй талаар хийж буй мэдэгдлүүдийг Москва дахь Смоленскийн талбай (ГХЯ) "байлдааны ажиллагааг үргэлжлүүлэхийг өдөөн турхирч буй үйлдэл" хэмээн нэрлэсэн байна.

Эх сурвалж: RIA NOVOSTI
Б.ЖАРГАЛ