Дархан-Уул аймагт үйл ажиллагаагаа явуулдаг “Дөрвөн Өлзий Агро” ХХК-ийн урилгаар Голланд улсын SCHAAP компанийн захирал, төмсний салбарын олон улсын туршлагатай мэргэжилтэн Ханс Гелинг Монгол Улсад хүрэлцэн ирж, ажиллаж байна.

Ханс Гелинг Дархан-Уул аймагт ажиллах үеэр төмсний тариалангийн талбайтай танилцаж, монголд ургуулж буй төмсний үрийн сорт, таримлын чанар, үйлдвэрлэлийн боломж нөөцийн талаар газар дээр нь судалгаа хийж байгаа юм. Энэ үеэр тэрээр төмс тариалалтын олон улсын туршлага, Голландын дэвшилтэт технологийн шийдлүүдийг нутагшуулах боломжийн талаар мэдээлэл өгөв.

Түүнчлэн Ургамал хамгааллын эрдэм шинжилгээний хүрээлэн болон Засгийн газрын хэрэгжүүлэгч агентлаг Ургамал хамгааллын газрын дарга Э.Уламбаатар болон холбогдох мэргэжилтнүүдтэй уулзаж, Монголын нөхцөлд тохирсон үрийн сортын сонголт, ургамал хамгааллын шинэ арга технологи, хорио цээрийн асуудлаар санал солилцлоо.

“Дөрвөн Өлзий Агро” ХХК нь төмсний үрийн чанарыг сайжруулах, шинэ сорт нэвтрүүлэх, улмаар Монголын хүнсний аюулгүй байдлыг хангахад чиглэсэн хамтын ажиллагааг өргөжүүлэх зорилготойгоор энэхүү уулзалтыг зохион байгуулав.

Энэхүү хамтын ажиллагаа нь цаашид Монголын төмсний үйлдвэрлэлийн хөгжилд олон улсын туршлага, шинэ технологийг нутагшуулах суурь алхам болж байна.