-У.ХҮРЭЛСҮХИЙН ҮРГЭЛЖИЛСЭН ЯЛАЛТ ХОТЫН ДАРГЫН
ТОМИЛГООН ДЭЭР УНАВ-

Том зургаар нь харвал, сүүлийн жилүүдэд У.Хүрэлсүх нам дотроо эхлүүлсэн улс төрийн акциуддаа амжилттай ялсаар иржээ. Шадар сайдын суудлаас Ерөнхий сайд, тэгээд намын дарга. Дараа нь МАН-ын гол зангилаа болж байсан М.Энхболдыг хүчгүйдүүлж, хотын даргын ажлыг өгүүлэн, УИХ дахь намын бүлгийн даргаар өөрийн хүнээ томилууллаа.

С.Батболд, Д.Хаянхярваа нарын албан тушаалыг авснаар тэднийг намын гол тогооноос буюу Удирдах зөвлөлөөс ч хаслаа. Одоо УИХ-ын дарга М.Энхболдыг хэзээ мөдгүй албан тушаалаас нь чөлөөлөх гэж байна. Ерөнхийдөө түүний ялалт босоо шугмаар өгссөөр ирэв. Энэ өгсөлт харин саяхан хотын даргын томилгоон дээр хугарч байгаа юм. Огцом өгсөлт огцом буурах аюултай. Тэр дундаа У.Хүрэлсүхийн нам дотроо эхлүүлсэн дайны гол цэг нь хотын фракци байсан тохиолдолд шүү.

Хотын фракцийг чиглэсэн өчнөөн олон акциуд нь амжилттай болсон мөртлөө яг даргыг нь сонгох үед дахиад тэдний талд алдлаа. Уйлах хэцүү, байх хэцүү байдалд оров. У.Хүрэлсүхийн талаас хотын даргаар НИТХ-ын өнөөгийн дарга С.Амарсайханыг сонгохоор нэр дэвшүүлсэн. Харин заалнаас Ц.Сандуйгийн талаас С.Мөнхчулуун өөрийгөө нэр дэвшүүлсэн билээ.

Хотын фракцийн тархи сайн гүйснээр Э.Бат-Үүл баатарын шүүх хурлын асуудлаар НИТХ дахь АН-ын бүлгийн саналыг базаж, М.Энхболд дарга нь Ц.Сандуйгийн талын төлөөлөгч нэг бүртэй утсаар ярьж, яриа хөөрөөгөө хийсэн гэх. Ийм байдлаар олон нийтийн хардаж байгаачлан, М.Энхболд, Ц.Элбэгдорж нарын хөшигний ард гар барьснаар У.Хүрэлсүхийн гавшгай ялалтыг тасдан унагаасан юм.

-С.МӨНХЧУЛУУН, С.АМАРСАЙХАН НАР ДАХИН ХҮЧ ҮЗНЭ-

НИТХ-аас даваа гаригийн үдээс хойш С.Мөнхчулууныг батламжлуулах бичгээ Ерөнхий сайдад хүргүүлсэн. Ерөнхий сайд хуулиараа батламжлах эсэхээ хэдий хугацааны дараа ч өгч болно. Нарийвчилсан тоо зааж өгөөгүй. Харин батламжлахгүй гэсэн бичгийг илгээсэн тохиолдолд НИТХ 15 хоногийн дотор дахин хотын даргыг тодруулна. Өмнө нь ялсан нэр дэвшигч дахин гарч ирсэн тохиолдолд тав хоногийн дотор Ерөнхий сайд шууд батламжлах үүрэг хүлээнэ. Хууль нь ийм заалттай аж.

Өөрөөр хэлбэл, С.Мөнхчулуун одоо ялвал Ерөнхий сайдаас эмээх айдсаа ардаа хийнэ гэсэн үг. Гэхдээ энд нэг анхаарууштай өнцөг бий. С.Мөнхчулуун ялж, хотын фракци дийллээ гэж бодъё. Гол нь, хотын фракцийн төлөөлөл нь Засгийн газар, намтайгаа хэрхэн ойлголцож ажиллах уу гэдэг дээр ихээхэн хүндрэл үүснэ. Сонгуулийн циклт хугацаа ойртчихсон үед МАН-ын ирээдүйд халтай байж болох.

Нөгөө талаар “С.Мөнхчулуун ажил хэрэгч. Хотын дарга болвол сайн ажиллана”, “Өө бүтэхгүй, сэлэм эргүүлдэг” гэхчлэн сошиал давалгаа өрнөсөөр буй. Ямар ч байсан М.Энхболдын талаас өмнө нь ялалт байгуулсан С.Мөнхчулууныг дахин нэр дэвшүүлж, гаргахын төлөө идэвхийлэн ажиллаж эхэлжээ. Мэдээж У.Хүрэлсүхийн талынхан ч зүгээр суухгүй. Тэд дотооддоо ярилцаж, “С.Амарсайханыг дахин дэвшүүлнэ” гэсэн санал дээр нэгдсэн гэх мэдээлэл байна.

Ингэхдээ С.Мөнхчулууны саналыг хагалж болох хувилбарууд дээр ажиллаж байгаа аж. Мэдээж эсрэг талд С.Мөнхчулууны өмнөх саналын тоог хадгалахын төлөө баг нь зүтгэнэ. Ийм байдлаар Нийслэл дээр хотын фракци ялах уу. У.Хүрэлсүх гол “бай”-гаа онож, барьцаа ахиулах уу гэсэн хүлээлт үүсчихээд байна.

Ж.МЯДАГБАДАМ