Иргэний нийгмийн байгууллагууд, ТББ-ууд нэгдэн шүүхийн шинэчлэлийн талаар болон Улсын дээд шүүхийн шүүгч нарыг огцруулах зорилготой жагсаал зохион байгуулах гэж буй талаараа мэдээлэл хийлээ. Тэд маргааш өглөө морин цагаас эхлэн гурван өдөр Дээд шүүхийн үүдэнд жагсаал цуглаан зохион байгуулах болсноо мэдэгдлээ.

Жагсаал зохион байгуулахаар санаачилсан иргэн Б.Батдэлгэр ярихдаа “Жагсаал цуглаан хийх журмын тухай хуулиар жагсаал цуглааныг бүтгүүлж зөвшөөрөл авдаг. Иргэн Б.Батдэлгэр миний бие зургадугаар сарын 25-28-н зохион байгуулах жагсаалаа Чингэлтэй дүүргийн засаг даргад бүртгүүлсэн байгаа. Жагсаал цуглаан хийхдээ тавьж буй шаардлага бол Монгол Улсын үндсэн хуулийн 16.14-д заасан Шударга шүүх, цэвэр ариун шүүхтэй байхыг шаардах. Хоёрдугаарт Монгол Улсын Ерөнхий шүүгчид шаардлага хүргүүлэх. Гуравдугаарт Монгол Улсын Дээд шүүхийн шүүгч нарыг огцрохыг шаардах, дөрөвдүгээрт төрийн үйл ажиллагаа тасралтгүй явагдах ёстой. Өөрөөр хэлбэл Монгол Улсын Дээд шүүхийн шүүгч нар долдугаар сараас есүгээр сарын дунд хүртэл хоёр сар гаран гурван танхим нь тэр чигээрээ амардаг. Шүүх эрх мэдэл бол Монгол төрийн үйл ажиллагаа. Гэтэл төрийн үйл ажиллагаа тасалдаж, зогсонги байдалд ордгоос болж шийдвэрлэгдэх ёстой хэргүүд цуглардаг. Тиймээс тасралтгүй үйл ажиллагаа явуулахыг шаардана.

Түүнчлэн иргэдээс шүүгч нарын хууль бус үйлдлийн талаар санал авах, санал солилцох, Үндсэн хуулийн нэмэлт өөрчлөлт, шүүхийн өөрчлөлтийн талаар ард түмнээс санал авах, тэдний дуу хоолойг хүргэх гэсэн шаардлага болон хүсэлтийн дагуу хийгдэж байгаа юм.

Иргэн Б.Батдэлгэр намайг та бүхэн мэдэж байгаа. Барилга угсралтын “Бүрэн цутгамал” компанийн захирал хүн. Барилга угсралтын ажил хийснээс болж хэлмэгдэж анхан болон давж заалдах шатны шүүхээс ял аваад, өнгөрсөн дөрөвүгээр сард дээд шүүхээр цагаатгагдсан. Иргэн болон захиргааны хэргийн шүүхүүд дээр хэрэг маргаан байгаа бол эцсийн дүндээ дээд шүүх дээр ирээд мөнгө, эрх мэдэл, танил талтай иргэдийн эрх ашгийг хамгаалсан шийдвэрийг Дээд шүүх гаргадаг гэдгийг нийтэд мэдэгдэхийн тулд энэ жагсаал цуглааныг бүртгүүлсэн.

Бүртгүүлэх явцад УИХ-ын таван гишүүн болон МАНАН дэглэмийн эсрэг монгол түмний нэгдэл, төрийн бус байгууллагууд жагсаалыг маань дэмжиж оролцоно гэсэн учраас “Шүүхийн хувьсгалыг Монгол Улсын дээд шүүхээс эхлүүлье” гэсэн уриатай жагсаал маргааш өглөө 11:40 буюу морин цагаас эхэлнэ.

Цэвэр ариун шүүх байхгүй болж, цэц мэргэн шийдвэр гаргахгүй болсон гэдгийг сүүлийн үед төр засаг нь хүртэл хүлээн зөвшөөрч байна. Тийм учраас иргэний хөдөлгөөний бид бүхэн шаардахгүй бол урд талын -30 хэмд хийсэн хоёр тэмцэл маань үр дүнгүй болох нь ээ. Монгол Улсын Ерөнхий шүүгч Зориг албан тушаалаасаа огцорсон ч гэсэн дээд шүүхийн шүүгч хэвээрээ байгаа. Мөн Ганзориг шүүгчийг Ерөнхий шүүгчид нэр дэвшүүлсэн боловч Ерөнхийлөгч хүлээн зөвшөөрөөгүйгээс Батсүрэн шүүгчийг Ерөнхий шүүгчээр томилсон. Энэ бол нүдээ олоогүй, шүүхийн шинэтгэл биш гэж бид эсэргүүцэж байгаа юм.” гэв.