ЦЕГ-ын Урьдчилсан сэргийлэх хэлтсийн ахлах мэргэжилтэн, цагдаагийн хошууч В.Хосбаяртай ярилцлаа.

-Өнгөрсөн оны байдлаар согтуугаар тээврийн хэрэгсэл жолоодсон хичнээн тохиолдол бүртгэгдсэн бэ?

-Монголчууд шинэ жилийн баярыг нэлээд өргөн хүрээнд тэмдэглэн өнгөрүүллээ. Баярын өдрүүдэд ААН-үүд согтууруулах ундааны зүйлийг хэтрүүлэн хэрэглэх явдал их байлаа. Үүнээс үүдэн согтуугаар тээврийн хэрэгсэл жолоодсон тохиолдол харьцангуй олон бүртгэгдсэн. Арванхоёрдугаар сарын 31-ны өдөр гэхэд нийслэл Улаанбаатар хотод согтуугаар тээврийн хэрэгсэл жолоодсон 19 зөрчил бүртгэгдсэн бол орон нутагт 13 зөрчил бүртгэгдсэн байна. Согтуугаар тээврийн хэрэгсэл жолоодсоноос болж өөрийн болон бусдын эрүүл мэнд, амь насанд хохирол учруулж буй золгүй тохиолдлууд гарсаар байгаа. Иргэд, олон нийт гарч болох олон эрсдлээс өөрийгөө болон бусдыг хамгаалах, урьдчилан сэргийлэх үүднээс баяр ёслолыг гэр бүлийн хүрээнд тэмдэглэн өнгөрүүлэхийг зөвлөе. Хүний амь нас, эрүүл мэндэд санаатай болон санамсаргүй байдлаар хохирол учруулах тохиолдол харьцангуй их гарч байна. Мөн жолоо шилжүүлэх асуудал их бий. Монгол Улсын замын хөдөлгөөний аюулгүй байдлын тухай хууль, тогтоомж түүнд нийцүүлэн гаргасан акт, дүрмэнд зааснаар тухайн тээврийн хэрэгслийн эзэмшигч нь согтуу жолоочид жолоо шилжүүлж, тухайн хүн тээврийн хэрэгсэл жолоодвол жолоо шилжүүлсэн этгээдэд давхар хуулийн хариуцлага хүлээлгэнэ. Тодруулбал, Замын хөдөлгөөний аюулгүй байдлын тхай хуулийн 14.7 дугаар зүйлд зааснаар

1. Тээврийн хэрэгсэл жолоодох эрхгүй, эсхүл тээврийн хэрэгсэл жолоодох эрх нь дуусгавар болсон хүн тээврийн хэрэгсэл жолоодсон бол хүнийг хоёр зуун нэгжтэй тэнцэх хэмжээний төгрөгөөр торгох,

2. Тээврийн хэрэгсэл жолоодох эрхгүй, эсхүл эрх нь дуусгавар болсон хүнд тээврийн хэрэгслийн жолоог шилжүүлсэн бол хүнийг нэг зуун нэгжтэй тэнцэх хэмжээний төгрөгөөр торгох,

3. Тээврийн хэрэгсэл жолоодох эрхгүй, эсхүл эрх нь дуусгавар болсон хүн согтууруулах ундаа, мансууруулах эм, сэтгэцэд нөлөөт бодис хэрэглэсэн үедээ тээврийн хэрэгсэл жолоодсон, эсхүл зохих журмын дагуу шалгуулахаас зайлсхийсэн бол албадан сургалтанд хамруулж, долоогоос гуч хоногийн хугацаагаар баривчлах шийтгэл оногдуулдаг байгаа.

Иргэдэд уриалахад баяр ёслолын үеэр согтууруулах ундааны зүйл хэрэглэхээс татгалзъя. Байгууллага, АНН-үүд энэ чиглэл рүү бусдыгаа уриалах хандлага харьцангуй сайжирч байна. Дээр дурдсанчлан зам тээврийн осол гаргах, согтуугаар тээврийн хэрэгсэл жолоодох, энэ тэнд нэгийгээ орхиж явснаас болж осгож, эндэх, халтиргаа, гулгаа ихтэй үед бэртэж, гэмтэх тохиолдол баяр ёслолын үеэр харьцангуй олон бүртгэгдсэн.

Хууль бусаар 58 хайрцаг, 36 төрлийн пиротехникийн хэрэгсэл Монгол Улсын хилээр нэвтрүүлжээ

-Пиротехникийн хэрэгслийн зөрчил бүртгэгдсэн үү?

-Монголчуудын хэлж заншсанаар бенгалын гал, салют зэрэг пиротехникийн хэрэгслээс болж эд, эрхтнээсээ салах, гэмтэж бэртэх тохиолдол харьцангуй олон гарч байна. Өнгөрөгч арванхоёрдугаар сарын 19-нд Монгол Улсын хилээр иргэн Б, М нар хууль бусаар 58 хайрцаг, 36 төрлийн пиротехникийн хэрэгсэл нэвтрүүлж, хуурамч фейсбүүк хаягаар иргэдэд зарж, борлуулсан зөрчил илэрсэн. Үүнийг цагдаагийн байгууллага илрүүлэн Чингэлтэй дүүрэг дэх Цагдаагийн I хэлтэс мөрдөн шалгах ажиллагаа явуулж байна.

-Согтуугаар тээврийн хэрэгсэл жолооддог энэ төрлийн зөрчил давтагдах тохиолдол байдаг. Үүнд ямар арга хэмжээ авдаг вэ?

-Замын хөдөлгөөний аюулгүй байдлын тухай хуулийн 14.7 дугаар зүйлийн тавд зааснаар Тээврийн хэрэгсэл жолоодох эрхгүй, эсхүл эрх нь дуусгавар болсон хүн согтууруулах ундаа, мансууруулах эм, сэтгэцэд нөлөөт бодис хэрэглэсэн үедээ тээврийн хэрэгсэл жолоодсон, эсхүл зохих журмын дагуу шалгуулахаас зайлсхийсэн бол албадан сургалтад хамруулж, долоогоос гуч хоногийн хугацаагаар баривчлах шийтгэл оногдуулдаг. Жолоодох эрхтэй хүн энэ төрлийн зөрчил гаргавал 400 нэгжтэй тэнцэх хэмжээний төгрөгөөр торгож, нэг жилээр жолоодох эрхийг хасдаг. Зам тээврийн осол бол хүний эрүүл мэндэд хамгийн их хохирол учруулдаг зүйл. Ахуйн шинжтэй хэргээс ялгаатай нь тээврийн хэрэгсэлтэй холбоотой үйлдэгддэг учраас маш хүнд гэмтэх, амь нас хохирох аюултай. Цагдаагийн байгууллагаас иргэдэд замын хөдөлгөөний дүрмийг сурталчлах, таниулах ажлыг хийж байна. Гэсэн хэдий ч иргэд өөрсдийн хандлагаа өөрчлөхгүй бол зам тээврийн ослын тоо буурахгүй. Зөвхөн техник хэрэгсэлтэй холбоотой гэлтгүй эрүүл мэнд, амь насаараа хохирох, осгож, хөлдөх, хулгайд эд зүйлээ алдах, дээрэмдүүлэх тохиолдол их байна. Иргэн хүний ухамсрын асуудал учраас согтууруулах ундааны зүйл хэрэглэсэн үедээ автомашин жолоодохгүй байхыг цагдаагийн байгууллагын зүгээс анхааруулж байна.