УИХ-ын гишүүн Ч.Ундрамтай цаг үеийн асуудлаар ярилцлаа.

-Маш хариуцлагатай цаг үед Улсын Их Хурлын гишүүн боллоо. Нийт монголчуудын төлөө хэрхэн ажиллах вэ? Ерөнхий сайдын зүгээс төрийн албанд ажиллаж байсан туршлагатай албан хаагчдыг УИХ-д нэр дэвшүүлсэн шүү дээ?

-Миний бие төрийн албанд 10 гаруй жил ажилласан. Төрийн үйлчилгээний албанд ордог Монгол Улсын Их Сургуульд багшаас эхлээд дэд захирал хүртэл бүх шатанд нь ажилласан туршлагатай. Мөрийн хөтөлбөрийн тухайд бүхэлдээ улс орноо хамарсан асуудлуудыг дэвшүүлсэн. Монгол Улсын Их Хурлын гишүүний хувьд ард иргэд рүүгээ чиглэсэн ажлуудыг хийнэ.

ҮР ХҮҮХДЭЭ ӨРСӨЛДӨХ ЧАДВАРТАЙ, АЖЛЫН БАЙРТАЙ, АМЬДРАЛЫН БАТАЛГААТАЙ БАЙХАД БЭЛТГЭХ ЁСТОЙ

-Боловсролын салбарт ажиллаж байсан хүний хувьд энэ салбарт ямар ажлуудыг зайлшгүй хийх шаардлагатай гэж харж байна вэ? Боловсролын салбарын хөгжлийг сайжруулахын тулд ямар хуулийн төсөл санаачлан ажиллах бодолтой байна?

-Бидний амьдарч буй цаг үе бол аж үйлдвэрийн дөрөвдүгээр хувьсгалын эрин үе, технологийн шилжилтийн үе. Дэлхий тэр чигтээ өөрчлөгдөж байна. Хүүхдүүдийн сэтгэлзүй, юм сурах хандлага, анхаарал хандуулах минут, секундээс эхлээд бүх зүйлс өөрчлөгдөж байна. Үр хүүхдээ аж үйлдвэрийн дөрөвдүгээр хувьсгалын эрин үед өрсөлдөх чадвартай, ажлын байртай, амьдралын баталгаатай байхад бэлтгэх ёстой. Тийм учраас боловсролын салбарт реформ хийнэ. Боловсролын салбарын багц хуулийг судалгаа, шинжилгээтэйгээр салбарынхаа бүх түвшний төлөөллүүдийг оролцуулж, хийх шаардлагатай байна. Энэ ажил богино хугацаанд хийгдэх боломжгүй. Учир нь боловсролын салбарт 21 аймаг, 9 дүүргийн сургуулийн өмнөх боловсролоос эхлээд ерөнхий боловсрол, мэргэжлийн сургалт үйлдвэрлэлийн төв, их, дээд сургуулиуд бүхэлдээ хамаарагддаг. Энэ том тогтолцоог ул суурьтайгаар судалж, хэлэлцэж байж реформ хийх ёстой.

ИРГЭДЭД ТУЛГАМДАЖ БУЙ ХАМГИЙН ХЭЦҮҮ АСУУДАЛ БОЛ

АЖЛЫН БАЙР

-МАН-ын мөрийн хөтөлбөрийн хэрэгжилтийг иргэд хүлээж байна. Хамгийн түрүүнд хийгдэх ажлын талаар?

-Үндсэн Хуулийн нэмэлт өөрчлөлттэй уялдуулан нэлээд олон хуулийг өөрчлөх ёстой. Хуулийн асуудал хамгийн түрүүнд тавигдана. Хоёрдугаарт, Эдийн засаг, экспортын асуудлууд яригдана. Эдийн засгаа хэрхэн солонгоруулах вэ, өрхийн аж ахуйг хэрхэн дэмжих вэ гэдэг чиглэл рүү маш яаралтай анхаарах шаардлагатай. Иргэдэд тулгамдаж буй хамгийн хэцүү асуудал бол ажлын байр. Ялангуяа хөдөө, орон нутагт ажлын байрны боломж, бололцоо хангалтгүй байна. Мэдээж тодорхой хувь нь төрийн албанд ажилладаг. Маш олон хүн орлогогүй амьдарч байна. Иймд өрхүүдэд чиглэсэн ажлын байруудыг бий болгож байж дараа нь боловсролын асуудлаа ярихгүй бол болохгүй. Нөгөөтэйгүүр, Эрүүл мэндийн асуудал давхар яригдана. Монгол Улс нийгмийн эрүүл мэндийн чиглэлээр нэлээн сайн ажиллаж байгаа нь улс оронд үүсээд буй онцгой нөхцөл байдлын үед ажиглагдаж байна. Гэхдээ хавдар, элэг, зүрх судасны өвчлөлийн тоо өдрөөс өдөрт нэмэгдэж байгаа шүү дээ. Иймд эрүүл мэндийн салбар луугаа маш сайн анхаарах хэрэгтэй.

ЗЭЭЛИЙН ХҮҮГ БУУРУУЛАХ ТАЛ ДЭЭР МАШ ШАРГУУ АЖИЛЛАХ ШААРДЛАГАТАЙ

-Эдийн засгийн хувьд маш хүнд дөрвөн жил болох нь. Энэ удаагийн парламент эдийн засгаа сайжруулахад чиглэсэн ямар арга хэмжээг авч ажиллах вэ? Эдийн засагч хүний хувьд байр сууриа илэрхийлнэ үү?

-Энэ бол маш том асуудал байгаа юм. Энэ удаагийн парламентад 19 эдийн засагч сонгогдсон. Нэгдүгээрт, Бид банк, санхүүгийн байгууллагын шинэчлэлд анхаарч, санхүүгийн тогтолцоогоо сайжруулах ёстой. Иргэдийн зээлийн хүүг бууруулах тал дээр маш шаргуу ажиллах хэрэгтэй байна. Микро түвшинд салбаруудын хөгжлийг дэмжих ёстой. Салбарууд, ЖДҮ эрхлэгчид, өрхийн аж ахуй эрхэлж буй иргэдээ дэмжиж, яаж эдийн засгаа сайжруулах вэ, хэрхэн ажлын байраа нэмэгдүүлэх вэ гэдэгт анхаарах нь чухал.

-Баярлалаа.