Гадаадад байгаа иргэдийг татаж авах ажлыг шат дараатайгаар зохион байгуулж байгаа. Долдугаар сард 14 агаарын татан авалт хийнэ. Одоогийн байдлаар 10 татан авалтаар 3397 хүн ирээд байна. Удахгүй энэ сардаа багтаан дахин 4 агаарын татан авалт хийж, энэ сардаа нийт татан авсан иргэдийн тоо 4,148 болох юм байна.

ГХЯ-ны Консулын газрын захирал Л.Мөнхтүшигээс зарим зүйлийг тодрууллаа.

-Хөл хорио тогтоосноос хойш хэчнээн иргэдийг татаж авсан вэ? Одоогоор хичнээн иргэд эх орондоо ирэх хүсэлт гаргаад байна ?

-Нэгдүгээр сарын сарын 28-наас хойш 14.371 иргэнийг авто зам болон агаарын замаар татан аваад байгаа. Монгол Улсын Засгийн газар болон Улсын Онцгой комиссын шийдвэрээр агаарын болон авто замын боомтыг шат дараатайгаар хааж эхэлсэн. Улмаар гуравдугаар сарын 12-ноос бүрэн хаасан. Нэгдүгээр сарын дунд үеэс Монгол Улсын иргэдийн амь нас, аюулгүй байдлыг хангах үүднээс урьдчилан сэргийлэхээр гадаад улсаас ирж буй хүмүүсийг нэвтрүүлэх тодорхой дүрмийг мөрдөж эхэлснээс хойш улсын хилээр орж ирсэн хүний тоо 67.000 гаруй болсон. Хил хааснаас хойш 44 орноос 14.371 иргэн ирсэн.

Харин авто замаар 6010 иргэн орж ирсэн. Тусгай үүргийн нислэгтэй холбоотой асуудлаар гомдол мэдээлэл болон иргэдийн өргөдөл маш их ирдэг. Бид тавдугаар сарын сүүлээс эхлээд тусгай үүргийн нислэгийн хуваарийг сар сараар гаргаж байгаа. Гадаадад байгаа иргэдийг татан авах ажиллагаа зургадугаар сараас эрчимжсэн. Долдугаар сард 11 нислэг хийхээр төлөвлөж байсан бол тусгаарлах байрны нөөц боломжийг нэмэгдүүлснээр нийт 14 нислэгээр 2445 иргэнээ татан авахаар ажил үргэлжилж байна.

· Долдугаар сарын 26-нд Франкфурт руу

· Долдугаар сарын 28, 29-нд Сөүл рүү

· Долдугаар сарын 30-нд Сидней рүү тус тус тусгай үүргийн онгоц хөөрнө.

Улсын онцгой комиссоос гадаадад байгаа иргэдийг шуурхай татаж авах ажлыг тасралтгүй зохион байгуулж байна. Одоогоор 55 улсаас 11.951 иргэн нутаг буцах хүсэлтээ гаргасан. Гуравдугаар сараас Элчин сайдын яамд нутаг буцах хүсэлтэй иргэдийн өргөдлийг хүлээн авч эхэлсэн. Нутаг буцах иргэдийн нэмэгдэж байгаа шалтгаан оюутнууд сургуулиа төгсөөд нутаг буцах хүсэлт гаргаж байна. Мөн зун болж байгаа учраас нутагтаа ирж амрах хүсэлтэй иргэд байгаа учраас нутаг буцах иргэдийн тоо буурахгүй байгаа.

ИРГЭДИЙН ӨРГӨДЛИЙГ АГУУЛГААР НЬ АВЧ ҮЗВЭЛ 11.951 ХҮНИЙ 5.497 НЬ УОК-ООС ТАВЬЖ БУЙ ТАВАН ШАЛГУУРТ НИЙЦЭХГҮЙ БАЙГАА

-Нутаг буцах хүсэлтэй иргэд аль улсад их байна вэ?

-Манай улсын 46 мянган иргэн оршин суудаг БНСУ-д байгаа иргэд дийлэнх нь эзэлж байна. Хүсэлт гаргасан иргэдийн өргөдлийг агуулгаар нь авч үзвэл 11.951 хүний 5.497 нь УОК-оос тавьж буй таван шалгуурт нийцэхгүй байгаа. Татан авах ажиллагааг зохион байгуулж эхэлсэн үеэс УОК-оос тавьсан шалгуурыг баримталж, хүмүүсээ татан авсан тул энэ хүмүүсийн тоо эрс буурсан. Өөрийгөө таван шаардлагыг хангахгүй гэж үзэн хүлээцтэй байсан иргэд маань саяхнаас өргөдлөө гаргаж эхэлсэн. Гадаад харилцааны сайд Н.Энхтайван ажлаа хүлээн авснаасаа хойш гадаад дахь Элчин сайдын яамдад тодорхой чиглэл өгсөн буюу татан авах хүртэл хугацаанд тухайн иргэнд тулгарсан асуудал, хүндрэл бэрхшээлийг шийдвэрлэхэд туслах, иргэн бүрийн өргөдөл хүсэлтэд хариу өгч байхыг үүрэг болгосон. Түүнчлэн татан авах ажиллагаатай холбоотой мэдээллүүдийг ил болгох чиглэл өгснөөр тухайн иргэний овог нэр, өргөдөл өгсөн огнооны дарааллаар нийтэд ил болгож эхэлсэн.

-Хөл хориог сунгавал татан авалтын ажлыг үргэлжлүүлэх үү?

-Нутаг буцах хүсэлтээ илэрхийлсэн иргэдийн өргөдөлд үндэслэн наймдугаар сард хийгдэх нислэгүүдийн хуваарийг төлөвлөсөн. Удахгүй болох Улсын Онцгой комиссын хурлаар эцэслэн шийдвэрлэнэ. Хийгдэж байгаа нислэгүүдийг судалгаан дээр үндэслэж хийдэг. Бүгд Найрамдах Чех улс руу тусгай нислэг үйлдэхээр хэлэлцээ хийж байгаа. Энэ нь Чехийн засгийн газрын дэмжлэгээр тухайн иргэдийн зардлыг дааж ирэх ирж байгаа нислэг.

-Тусгай үүргийн нислэгт багтаж чадаагүй зарим иргэн Инчеон олон улсын нисэх буудалд суулт зарласан. Энэ нь тусгай үүргийн нислэгийн зөвшөөрөл авахад ямар нэгэн хүндрэл учруулж байгаа юу?

-Долдугаар сард гурван удаа Сөүл рүү ниснэ гэж байсан бол таван удаа хийхээр болсон. Иргэд ЭСЯ-ны гадна жагсаал цуглаан хийж, үзэл бодлоо илэрхийлж байгааг Консулын ажилтнууд тухай бүрд нь мэдээлэл өгч байна. Жагсаал цуглаан хийх нь хүний эрхийн асуудал. Сүүлийн үед Сөүлд болж буй жагсаалыг Солонгосын цагдаагаас зөвшөөрөл аваад хийж байгаа нь ч бий. Харамсалтай нь тухайн улсын онцгой объект болох онгоцны буудал дээр зохион байгуулалттайгаар суулт хийж байгаа нь нэг талаас үзэл бодлоо илэрхийлж байгаа боловч нөгөө талаас БНСУ-ын төрийн байгууллагуудын зүгээс тусгай үүргийн нислэг хийхтэй холбоотой хүндрэл гаргаж байгааг хэлмээр байна. Нислэг бүрийг зөвшөөрлийн дагуу хийх бөгөөд зөвшөөрөл авахын тулд олон ажил хийгддэгийг ойлгохыг хүсье. Нэг иргэний хариуцлагагүй үйлдэл нь нутаг буцах хүсэлтэй олон иргэнд хүндрэл учруулах магадлалтай тул үзэл бодлоо илэрхийлэхийн хамт хариуцлагатай байхыг хүсмээр байна.

ХИЛЭЭ НЭЭ ГЭЖ БАЙГАА НЬ “ХАЛДВАР ХАМГААЛЛЫН ДЭГЛЭМЭЭ БИТГИЙ САХИУЛААРАЙ” ГЭСЭНТЭЙ АГААР НЭГ

-Консулын газарт иргэдээс ямар гомдол мэдээлэл ирж байна вэ?

-Иргэний нийгмийн байгууллагаас Гадаад харилцаа яам болон ОУК-д маш олон асуудлыг тавьдаг. Иргэдээс ирж байгаа өргөдөлд тусгаарлах байрны хоногийг 14 хоног болго, хилээ нээ, үнээ буулга гэсэн гурван шалтгааныг тавьж байна. Тусгаарлаж хугацааг мэргэжлийн байгууллага нь тодорхой судалгааны мэдээлэл дээр үндэслэж шийдвэрээ гаргаж байгаа учраас Гадаадад харилцааны яамны зүгээс тодорхой тайлбар тавих боломжгүй. Хил нээх асуудлыг бас их ярьдаг. Хилээ нээ гэж байгаа нь халдвар хамгааллын дэглэмээ битгий сахиулаараа гэсэнтэй агаар нэг. Өнөөдрийг хүртэл дотооддоо халдвар алдаагүй байгаа учраас иргэд тайвширч байгаа. Дэлхийн 216 улсад халдварын тохиолдол буурахгүй байгаа гэдгийг хүмүүс ойлгох хэрэгтэй. Дэлхийд халдвар авсан хүний тоо буурахгүй байгаа. Иймээс хилээ нээх нь улс үндэсний аюулгүй байдалд болон иргэний амь настай холбоотой асуудал учраас шууд хилээ нээх асуудал хүндрэлтэй гэдгийг иргэд ойлгох хэрэгтэй.

-Монголоос гадаад руу явах өргөдөл гомдол ирж байна уу?

-Ирж байгаа иргэдээс гадна явах хүсэлтэй иргэдийн өргөдөл их байна. Тэр дундаа БНХАУ руу явах хүсэлтэй иргэд маш олноор хандаж байгаа. Гадаад харилцааны яаманд ирж байгаа өргөдлийн дийлэнх нь ийм агуулгатай хүсэлтүүд байна. Өнгөрсөн тавдугаар сараас эхлээд Гадаад харилцааны яам БНХАУ-ын талтай ажиллаж байгаа. Та бүхний мэдэж байгаачлан хоёр улсын Засгийн газар хамтран "Ногоон гарц" журмыг гаргасан. Энэ нь зөвхөн хоёр улсын ачаа тээврийн жолооч нар, бүтээн байгуулалт, томоохон төсөл хөтөлбөрийн ажилтнуудыг нэвтрүүлэх журам. "Ногоон гарц"-аар оруулж, гаргалаа гээд тусгаарлахгүй гэсэн үг биш бөгөөд хил хаасан үед тухайн иргэнийг нэвтрүүлэх шийдвэр гаргах явцыг шуурхай болгосноороо давуу талтай. Тус улс руу явах хүсэлтэй байгаа иргэдээ "Ногоон гарц"-аар гаргах асуудлыг тавьсан ч Хятадын талаас дотоодын аюулгүй байдал, халдвар хамгааллын дэглэмийнхээ хүрээнд гадаад улсын иргэдийг нэвтрүүлэх боломжгүй гэдгээ албан ёсоор мэдэгдсэн. Бид өргөдөл гомдлыг ангилж явж байгаа. Өргөдөл болгон дээр анхаарч ажиллаж байгаа.

-Орогнох байргүй, санхүүгийн боломжгүй болсон иргэн их байна. Эдгээр иргэнээ консулын газрууд хэрхэн анхаарч байгаа вэ?

-Иргэдийн өгсөн өргөдөл бүрийн агуулгыг уншиж, ангилдаг. Хүндрэлтэй байгаа иргэдээ яаралтай татан авахаас гадна тусламж үзүүлж байгаа. Тухайлбал, гадаадад байгаа иргэд дундаас харьцангуй хүнд нөхцөл байгаа нь Турк дэх иргэд. Тэдгээр иргэндээ төсвийнхөө боломжийн хүрээнд 250 өрх буюу 1,000 орчим хүнд 7-10 хоногийн хүнсний талон өгч байна. Бэлэн мөнгө тараах ямар ч боломжгүй тул хэрэгтэй зүйлээ авах боломжийг нээх арга хэмжээг өнгөрсөн хугацаанд бүрдүүлж байна.

Мөн Гадаад харилцааны яам олон улсын байгууллагатай хамтран ажиллаж, Туркэд байгаа иргэдийн байрны түрээс, цахилгааны төлбөрийг тодорхой хэмжээнд шийдэж өгөхийг хүссэн. Ойрын хугацаанд нааштайгаар шийдэгдэх байх.

АВЛИГА ӨГСӨН АВСАН ГЭХ МЭДЭЭЛЭЛ БАЙГАА БОЛ ХОЛБОГДОХ ГАЗРУУДАД НЬ ӨГӨХ ХЭРЭГТЭЙ

-АТГ УОК-ын үйл ажиллагааг шалгаж байгаа гэсэн. УОК-ын ажилтнууд, гадаад улсууд дахь ЭСЯ-д, консулын газрын ажилтнууд бусдад авлига авч, жагсаалтын доогуур байсан иргэдийг түрүүлж авчирсан гэх мэт мэдээлэл байгаа?

-Хилээ хаасан нөхцөл байдалд гадаадын элчин сайдын яамуудад үйл ажиллагаа хэвийн явуулахад хүндрэлтэй байна. Иймээс ажиллаж байгаа хүмүүсийг ирүүлээч гэдэг хүсэлтийг маш олноор тавьж байгаа. Эхний гурав дөрөв сарын нислэг болон таван сарын нислэгүүдэд ЭСЯ-д, консулын газрын ажилтнуудыг аваагүй. Иргэд ирэх гээд маш хүнд нөхцөл байна гэдгийг тайлбарлаж ирсэн. ЭСЯ-ын хүсэлтийг гаргаж үзээд зургаан сарын нислэгээс эхлээд нэг нислэгт 3-5 хүнийг авч ирж байгаа. Тухайн улсын ЭСЯ үйл ажиллагаагаа хэвийн явуулах шаардлагатай. Бид иргэдийг татан авахаас гадна Монгол Улсын гадаад харилцаа болон бодлого тасралтгүй явж байгаа.

Мөнгө төгрөгтэй холбоотой асуудал дээр гомдол шүүмжил маш их байгаа. Авлига өгсөн авсан гэх мэдээлэл байгаа бол холбогдох газруудад нь өгнө үү. Энэ хүнд цаг үед хүний зовлонгоор ашиг хонжоо хайсан бол заавал шалгуулна. ГХЯ болон хилийн чанад дахь элчин сайдууд, консулууд энэ оны эхнээс өндөр ачаалалтай ажилласаар ирлээ. Бид хийх ёстой ажлаа л хийж байна. Иймд хэн нэгнийг түрүүлж авчрахын тулд авлига авсан консулын ажилтан нэг ч байхгүй гэдгийг би баттай хэлнэ. Өндөржүүлсэн байдал шилжсэн өдрөөс эхэлж цаг наргүй, иргэдийн дарамтад шүүмжилд ажиллаж байгаа.