Айбекс-Моламын хэрэг нь 1995 онд Монгол улсын газар нутгийг Айбекс гэдэг группт 90 жилийн хугацаатай концессээр олгох мөн Молоам гэгч группт Монгол улсын агаарын орон зай, гадаад худалдааны эрхийг 60 жилийн хугацаатай олгох тухай гэрээнүүд бөгөөд эдгээрийг тухайн үеийн Монгол улсын Ерөнхийлөгч П.Очирбат, Ерөнхий сайд П.Жасрай нарын зөвшөөрлөөр байгуулсан байна.

Айбекс группэд Монгол улсын газар нутаг, тэр дотроо байгалийн баялаг бүхий бүх нутгийг 90 жилийн хугацаатай эзэмшүүлэхээр Засгийн Газар шийдэж, гэрээ байгуулан гарын үсэг зурцгаасан байлаа. Тэр группийг төлөөлж арабын нэгэн шейх, Монгол Улсын Засгийн Газрыг төлөөлж тухайн үед Хууль зүй дотоод хэргийн дэд сайд асан, одоо Үндсэн хуулийн цэцийн Сугар тус тус гарын үсэг зурсан байна. Гэрээний дагуу Айбекс групп нь 90 жилийн хугацаанд Монголын бүх газар нутгийн хэмжээнд Байгалийн баялаг ашиглах асуудал дээр хариуцах бөгөөд энэ тухай хүссэн бүх хүн зөвхөн энэ группээс зөвшөөрөл, лицензээ авахаар заасан байжээ.

Малайзийн Молам группэд Монголын агаарын бүх орон зайг 60 жилийн хугацаатай эзэмшүүлэх гэрээг 1995 онд Засгийн Газар байгуулж, гэрээнд тухайн үеийн Дэд бүтцийн сайд Сандалхаан гарын үсэг зурсан байдаг. Гэрээ хэрэгжсэн бол Монголын тэнгэр тэр чигтээ Моламийн мэдэлд очиж, гадаадын онгоц дайран өнгөрөх, телевиз, радио, гар утасны шугам, сүлжээг ашиглах бүх зөвшөөрөл мөн л Моламын гарт төвлөрөх байв.

Харин МоАХ, ардчиллынхан П.Жасрайн Засгийн газрын эл үйлдлүүдийг эсэргүүцэж өлсгөлөн зарласнаар уг гэрээнүүд цуцлагдаж байжээ. 1994 онд ардчиллынхан П.Жасрайн Засгийн газрын шударга бус шийдвэр, нийгэмд бугшсан авилга хээл хахуулийг эсэргүүцэж, 12 хоногийн турш өлсгөлөн зарлаж байсан түүхтэй аж. Энэхүү тэмцлийн үр дүнд “Айбекс”, “Молам” компанитай 90 жилийн хугацаатай байгуулсан гэрээг цуцлуулж, Монголын агаарын тээвэр, эрчим хүчний салбарыг гадныхны монополь эрхээс гаргаж байжээ.

Үндэсний эрх ашиг, аюулгүй байдлыг ноцтой аюулд унагах энэ мэт үйлдэл дахин давтагдахгүй гэх үндэслэл, найдвар бий юу. Нухацтай дүгнэлт, судалгаа хэзээ нэгэн цагт хийгдэж, Оюу-толгой, Эрдэнэт зэрэг стратегийн салбаруудад ололт, амжилт, хор хохиролоо дүгнэн хэлэлцэх цаг ч мөд тохиох биз.

ҮНДЭСНИЙ АЮУЛГҮЙ БАЙДЛЫН ҮЗЭЛ БАРИМТЛАЛ

3.2 ЭДИЙН ЗАСГИЙН АЮУЛГҮЙ БАЙДАЛ

Эдийн засгийн бие даасан байдлаа хангаж хөгжих, байгальд ээлтэй, хүний аюулгүй, амгалан амьдрах боломжийг бүрдүүлсэн тогтвортой хөгжлийн загварыг бий болгох нь эдийн засгийн аюулгүй байдлыг хангах үндсэн нөхцөл мөн.

Эдийн засгийн олон тулгуурт, оновчтой бүтцийг бий болгох, хөрөнгө оруулалтын тэнцвэртэй бодлого явуулах, санхүүгийн салбарын аюулгүй байдлыг баталгаажуулах, эрчим хүч, эрдэс баялгийн болон гадаад худалдаа, интеграцийн асуудлаар оновчтой бодлого баримтална.