Монголд эдийн засгийн хямрал ард иргэдийн амьдралд дарамт болж яран дээр шарх болсоор. Нийгмийн сэтгэл зүй зэрлэгших үндсэн шалтгаан судлаачдын дүгнэж буйгаар авлигажсан төр засагтай шууд холбоотой. Авлига гэдэг аварга том паразит эрүүл тогтолцоог хөгжих боломжгүй болтол нь баглаж зэрэмдэглэнэ.

Ингэж дүгнэхийн учир нь сүүлийн жилүүдэд гэмт хэргийн гаралтын тоо өмнө нь байгаагүйгээр өндөр болж хүмүүсийн зан авир ч хэрцгий балмад араатанлаг шинж давамгайлж байна.

Хүчирхийллийн эсрэг үндэсний төв ТББ-д энэ оны эхний зургаан сарын байдлаар онлайнаар 859, утсаар холбогдсон 444, биечлэн 348 хүн зөвлөгөө авсны 52 нь хөгжлийн бэрхшээлтэй иргэд, 0-18 насны 53 хүүхэд болон асран хамгаалагчийн хамт хандаж гэр бүлийн хүчирхийллийн эсрэг тусламж үйлчилгээ, хууль эрх зүйн мэдээ мэдээлэл авчээ.

Судалгаанаас үзэхэд хүүхэд хүчирхийллийн золиос болж буй шалтгааны 70 хувь нь архины хамаарлаас, үлдсэн 30 хувь нь эцэг эхийн хараа хяналт, гэр бүл салалт, маргаан уур бухимдал, хоол ундны хүрэлцээ, сэтгэцийн эмгэг зэргээс үүдэлтэй аж. Түүнчлэн дийлэнх хувь буюу 56 хувийг үл хайхрах хүчирхийллийн тохиолдол эзэлдэг гэнэ.

Хүүхдийн хүчирхийллийн эсрэг гэмт хэрэг өмнөх оны энэ үетэй харьцуулахад 79.3 хувиар өссөн байна.

Хүчирхийллийн үндсэн шалтгаан болсон ядуурал, архидалт, ажилгүйдлийг бууруулах чиглэлээр төр засагаас бодитой ямар ажил хийв?

Бяцхан үрс хүчирхийллийн дор өсч өндийж байхад төр улсаа тонон дээрэмдэж, сандал суудал булаацалдсаар ямар олон он жилүүдийг ард үднэ вэ. Монголд хүүхэд багачууд эрүүл саруул элэг бүтэн санаа сэтгэл нь тайван амгалан өсч өндийх боломж хэзээ бүрдэх вэ?