"Төрийн ордны мэдээлэл, үйлчилгээний цогцолбор" төрийн өмчит, аж ахуйн тооцоот газрын үйл ажиллагааг энэ сарын 1-нээс татан буулгасан. Ингэснээр Төрийн ордны зоогийн газар ажиллахгүй болсон. Тиймээс туршлагатай, мэргэжлийн түвшний ААН-үүдийг сонгон шалгаруулж, түрээсийн үйлчилгээгээр үйл ажиллагааг явуулна гэж ЗГХЭГ-ын дарга Д.Амарбаясгалан мэдэгдэж байв.

Энэ талаар Төр засгийн үйлчилгээг эрхлэх газраас "Төрийн ордны зоогийн газрыг зориулалтын дагуу түрээслэх сонгон шалгаруулалтыг өнгөрсөн сард зарласан, хугацаа нь нэгдүгээр сарын 12-нд дуусна. Одоогоор материал ирүүлсэн газар байхгүй. Ганц нэг байгууллага ирж үзэж л байна.

Сонгон шалгаруулалт дуустал Төрийн ордонд "Modern nomads" рестораны катеринг үйлчилгээг оруулсан.Зоогийн газрын талбайн хэмжээ 838.72 м.кв.Нэг м.кв талбайн түрээсийн үнэ сарын 10 мянган төгрөг" гэв.

Сонгон шалгаруулалтад орох ААН нь улстөрчид болон тэдний бизнес, хамтрагчтай холбоогүй байх ёстой хэмээн Засгийн газрын тогтоолд тусгажээ.