Монгол дах НҮБ-ын Хүүхдийн Сангаас Монгол Улсын КОВИД-19 цар тахлын цаашдын бэлэн байдал, хариу арга хэмжээнд зориулж 2.9 тэрбум төгрөгийн нэмэлт тусламж үзүүллээ. Тус санхүүжилтийг Герман улсын Засгийн газраас Монгол Улсад НҮБ-ын Хүүхдийн Сангаар дамжуулан хандивласан юм. Тус хандиваар НҮБ-ын Хүүхдийн Сангаас Монгол Улсын эрүүл мэндийн салбарт нэн шаардлагатай тоног төхөөрөмж, эм эмийн хэрэгсэл нийлүүлж, мөн эрүүл мэндийн мэргэжилтнүүдийн аливаа цар тахлын үеийн бэлэн байдал, чадавхыг бэхжүүлэх, эрүүл мэндийн үйлчилгээ, хариу арга хэмжээг улс орон даяар улам сайжруулах зэрэг үйл ажиллагааг хэрэгжүүллээ.

Цар тахал эхэлснээс хойш Монголд нийт сая гаруй халдвар бүртгэгдэж, 2023 оны 1 сарын байдлаар 2100 гаруй хүн амиа алдаад байна. Хэдийгээр өдөрт бүртгэгдэх тохиолдлын тоо буурч байгаа хэдий ч КОВИД-19 төдийгүй одоо ид дэгдээд байгаа улирлын томуу, томуу төст өвчнөөс урьдчилан сэргийлэх, эмчлэх бэлэн байдал, хариу арга хэмжээг улам бэхжүүлэх шаардлагатай байгааг НҮБ-ын Хүүхдийн Сан болон ДЭМБ зөвлөж байна.

“Цар тахлын тохиолдлууд дэлхий даяар буурч байгаа хэдий ч КОВИД-19 нийгмийн эрүүл мэндийн нэн тэргүүний асуудал хэвээр байгаа. Тиймээс бид эрүүл мэндийн салбарын бэлэн байдал, хариу арга хэмжээ, чадавхад хөрөнгө оруулалт хийж байх нь чухал. Дээрээс нь Монгол Улсад улирлын томуу, томуу төст өвчний дэгдэлт ид оргил үедээ байна. Үүнд нь хүүхэд, жирэмсэн эхчүүд хамгийн ихээр өртөж байна. Тиймээс Германы Засгийн газрын энэ өгөөмөр санхүүжилтээр эмнэлэг, эрүүл мэндийн төвүүдэд нэн шаардлагатай байгаа тусламжийг үзүүлж байна” гэж Монгол дахь НҮБ-ын Хүүхдийн Сангийн Суурин төлөөлөгч Эваристе Коуассие-Комлан хэлэв.

Өнгөрсөн 2022 онд НҮБ-ын Хүүхдийн Сангаас нийт 6.4 тэрбум төгрөгийн өртөг бүхий эмнэлгийн яаралтай тусламжийн зөөврийн эмнэлэг, нярайн эрт үеийн тусламж, үйлчилгээнд шаардлагатай ургийн монитор, инкубатор, хувийн хамгаалах хэрэгсэл, хувцас, нэн шаардлагатай эм, эмнэлгийн хэрэгсэл зэргийг эрүүл мэндийн салбарт хүлээлгэн өгөв.

Дэлгэрэнгүй мэдээллийг дараах хаягаас авна уу:

Д.Ариунзаяа

Мэдээлэл, харилцааны мэргэжилтэн

Гар утас: +976 9911 2652

НҮБ-ын Хүүхдийн Сангийн тухай

НҮБ-ын Хүүхдийн Сан нь дэлхийн улс орнуудын хамгийн тусламж авах боломжгүй, хамгийн тусгаарлагдсан хүүхдүүдэд хүрч ажиллахаар ажилладаг. Дэлхийн 190 гаруй улс орон, нутаг дэвсгэрт амьдарч буй хүүхэд бүрийн төлөө, тэдний хаана амьдарч байгаагаас үл хамааран, тэдэнд амьдрах илүү сайн сайхан орчныг бүрдүүлэхийн төлөө ажилладаг. НҮБ-ын Хүүхдийн Сангийн талаар болон хүүхдийн төлөө хэрэгжүүлдэг үйл ажиллагааны талаарх дэлгэрэнгүй мэдээллийг НҮБ-ын Хүүхдийн Сангийн Facebook, Twitter, Instagram хуудаснаас авч болно.