XXI ЗУУНЫ ЁС СУРТАХУУН&УЛС ТӨРИЙН НАМУУД:
Судлаач Б.Оюунчимэгийн орчуулсан энэ ном нэрнээсээ л миний анхаарлыг татсан. Эхний 50 хуудсыг өнөөдөр уншив.
Хүмүүсийн бөөгнөрөл нь /хотжилт, фб, твитер, тв, автобус, метро, улс төрийн нам, ажил, сургууль гм/ хувь хүний ёс суртахууны орон зай руу түмэн янзын аргаар довтолж байна. Бөөгнөрлийн нэг том жишээ болох орчин үеийн хүчирхэг улс төрийн намууд нь хувь хүмүүст өөрсдийн ёс суртахууныг бяртай, давтамжтайгаар тулгаж бна. Хэт вакумжсан идэвхитэй гишүүд нь өөрийн дотоод ёс зүйг умартаж хүчээр гаднаас хийж өгсөн ёс суртахуунаар тэжээгдэж улмаар олон нийтэд тэрхүү улс төрийн нам болон даргын ёс зүйг халдаан тараадаг хамгийн хүчирхэг машин болдог гэнэ.

Орчин цагт аль нэг улс төрийн нам нь өөрийн ёс суртахуунаа улс орноосоо урвах, эх орноо худалдах, ард түмний хөрөнгийг хувьдаа ашиглах, авилгаар бусдад өгч завшуулах явдал мөн гэж үзсэн л бол түүнийгээ хөрөнгө санхүү, хүчтэй техник хэрэгсэл, давтамжаар вакумжсан гишүүдийнхээ оюун санаанд хүчээр тулгаж чадах ажээ. Орчин үеийн хүмүүс бөөгнөрөлд найдаж, өөрөө ёс суртахууны эрэл хайгуул хийхийг бараг хаясан. Тэд гаднаас хүчээр хийж өгсөн муу муухайг сайн зүйл, ёс зүй үгүйг ёс зүйтэй гэж хүлээн авах магадлал өндөр болсон нь эмгэнэл юм даа.
Энэ номыг уншиж байхдаа

АН-ын сүүлийн хэд хоногийн бөөгнөрөл нь эвлэж нэгдэх талдаа / гишүүд нь угтаан бол тэгж бодож байгаа гэдэгт эргэлзэхгүй байна/ тун зөв хэдий ч үр дүн нь муу муухай ёс зүйг зөв зүйтэй хамгийн сайн ёс зүй гэсэн хүчтэй сурталд автаж төгсөх вий дээ гэж эмээх. Болгоомжлох буй за.

Ард түмний амьдрал доройтох нь байж болох жирийн үзэгдэл, төрд ороод улс орноо цөлмөх нь байж болох явдал, гэхдээ ард түмэнд сонгуулийн үеэр энэ дэлхийд байж болох хамгийн гоё амлалт, хамгийн гоё харилцааг үзүүлэх, идэж уусан албан тушаалтангуудын ясыг цайлгана гэж амлах нь МАН-ын ёс суртахууны жирийн хэм хэмжээ болоод байх шиг санагдах.

Тэгэхээр манай том намууд ёс суртахууны хувьд бидний өмнө мэддэг байсан тэр намууд биш болжээ, миний л бодлоор шүү. Бидний мэдэх ёс суртахуун өөр ёс суртахуунаар солигдоод нилээд явчихжээ. Тэр өөр ёс суртахууныг сонсдог, хүлээн зөвшөөрдөг, дэмждэг бүхэл бүтэн давхрагатай болчихжээ.

Одоо яах вэ?

Бидэнд байсан, одоо ч бидний дотоодод байсаар байгаа гэр бүлээ, эх орноо, ард түмнээ жинхэнээсээ хайрладаг, хулгайч, худалч, дээрэмчинг дээш нь залах биш доош нь суулгадаг жинхэнээсээ үнэнч, шударга ёс суртахууны төлөө хөдлөх цаг болжээ.

Хаанаас эхлэх үү гэж үү?

Бүх улс төрийн намуудаа тарааж шинээр зохион байгуулахаас өөр ёс зүйн гарц нэгэнт үгүй болжээ. Хүний нийгмийн адгуусны сүргээс ялгагдах гол ялгаа нь ЁС ЗҮЙ гэдэг дээ.