Цагаан сарын баяр дөхсөнтэй зэрэгцэн эрхэм түшээд тойрогтоо оймс, чихэрхэн барьж, хуурамчаар саймширч ард түмнээ сайхан сэтгэлээр нь далимдуулан сонгуулийн “кок” авч мэхлэлтийн ажиллагаагаа өрнүүлсээр. Ер нь сонгогчдын сэтгэл санаагаар татах зорилгоор аливаа хэлбэрээр бэлэг тараах үйлдлийг төрийн албаны хуулиар хориглох хэрэгтэй. Учир нь эл үйлдэл нь өгсөнийг гар хоосон буцаадаггүй цайлган, өрөвч монголчуудын сайхан уламжлал дээр нь дөрөөлж төрд заларах гэсэн “луйвар”-ын шинжтэй ужиг хортой зүйл.

Үнэхээр ахмад буурлууддаа хүндэтгэл үзүүлэх, сайн түшээгээ харуулмаар бол часхийсэн хууль санаачлаад иргэдийнхээ амьдралыг цогцоор нь сайжруулах бодлогын чанартай үндсэн ажлаа л тултал хийх нь зөв.

Хаад ноёдоос хишиг горьддог дундад зууны үе биш сэн дээ. Ард иргэд ч өчүүхэн зүйлээр хуурах гэж явахын оронд төрөө эмхлэх шаардлагыг гишүүдээдэд эрс шулуун тавьж чаддаг байх хэрэгтэй. Иргэдийн улс төрийн ухамсар ийм л зүйл дээр тулгуурлана.

Хүндэтгэл илэрхийлэхийг улсын төсвөөр хэдэн тэрбумыг зарлагадах, таваг хүрэхгүй хужаа чихэр, таван хоног өмсөхгүй сэмэрхий оймсоор доромжлох гэж ойлгож байгаа улс төрчид амь бөхтэй оршсоор байгаа нь эмгэнэл.

Ер нь улс төрийн зорилгоор эд зүйл, мөнгө төгрөг тараах нь ард түмнийг авлигадахаар оролдож буй үйлдэл мөн үү. Эс бөгөөс ард түмэн, ахмад буурлууддаа амин зүрхнээсээ хайртай, төрийнхөө төлөө чин шударгаа зүтгэж, хайрт эх орноо хөгжлийн манлайд хүргэж гавъяагаараа гал өрдөж яваа ариун гэгээн түшээдийн минь хишиг буян уу? мэдэх юм алга.