Нийгмийг бүрдүүлэгч анхны нэгж гэр бүл гэдгийг мэдэхгүй хүн ховор. Гэвч Монголд олон шалтгаантай гэр бүлийн тогтворгүй байдал, ил, далд хүчирхийлэл нэмэгдсээр байгаа нь харамсалтай. Гэр бүлийн хүчирхийлэлд ихэвчлэн хүүхэд, эмэгтэйчүүд өртдөг бол эрчүүдийн хувьд сэтгэл зүй, ахуйн эдийн засгийн хямрал, ажилгүйдэл, архидалтаас үүдэх хохиролын үүтгэгч байх нь олон.

Гэр бүлийн хүчирхийлэл бие махбод, бэлгийн сэтгэл санааны гэх мэт төрлүүдэд ангилан авч үзэх ч орчин үед сэтгэл санааны болон эдийн засаг, ахуйн хам шинжийг агуулсан санхүүгийн далд хүчирхийлэл гэр бүлүүдийн дунд эрс нэмэгдэх хандлагатай боллоо.

Үнийн өсөлтөөс үүдэх өртгийн талийлт, үйлдвэржилгүй Монголын хямралыг дагаад нийгмийн бичил түвшинд буюу гэр бүлийн санхүүгийн нөхцөл байдал доройтож, хумигдах нь гарцаагүй ч боловсролын түвшин, хувь хүний дотоод ухамсар хандлага сэтгэл зүй, гэр бүлээ авч явах чадвар зэрэг нь дутагдахад гэр бүлийн үүрэг хариуцлага алдагдан, эрчүүдийн гэр бүлдээ хандах хандлага ухамсар нь шалдаа бууж, эргээд эхнэр хүүхдийнхээ хоол хувцасны мөнгөнөөс өөрийн хэрэгцээнд хүчлэн хуваарилж, сэтгэл санааны болон ахуйн дарамт үүсгэх тохиолдол олширсоор.

Хүний нийгэм үүсэн бүрэлдэх цагаас эрчүүд ан ав хийж гэр бүлдээ хоол, хэрэгцээний эд зүйлээр хангах үүрэгтэй байсан бол эхнэрүүд гэр бүлийн нөөцийн хуваарилалтыг маш оновчтой хийж ирсэн. Нийгмийн анхдагч амьжиргаа ахуйн амьдралын хэлбэрүүд өөрчлөгдсөн ч бүтэц, зарчим, эр эм хүйсийн нөлөөлөл, онцлогийн ялгаа төдийлөн өөрчлөгдөөгүй хэвээр. Иймд дэлхийн бүх оронд эхнэрүүд гэр бүлийн санхүү, ахуйн тооцоо, зохицуулалтаа хийсээр.

Зарим гадаадын орнуудын хүн амын дундах судалгаанаас үзвэл гэр бүлийн нөөцийн шударга бус хуваарилалт эмэгтэйчүүдийн үйлддэг хүчирхийлэл гэгддэг ч Монголд эсрэгээрээ байна. Ядуурлын нөлөө бий ч үүнд хувь хүний сэтгэлгээ ухамсар нөлөөлж байгаагаас үзвэл хөгжихийн тулд эхлээд төлөвшиж, боловсорсон иргэнтэй байх шаардлагатай нь харагдана.

Хүн амын сэтгэлгээний түвшин, ухамсар, сэтгэлзүйн хандлага, нийгэмд төлөвших бие хүний хүмүүжил асар дутагдалтайг харуулсан эл асуудлыг судлах, тооцоолох, салбарын бодлогод тусгах шаардлага тулгарчээ.

Архидалтын хамж шинж, ахуйн мэдрэмжгүй хандлага, тооцоолоогүй үрэлгэн зардлаас үүдсэн гэр бүлийн далд хүчирхийлэл, салалтын гол шалтгаан гэдгийг хүүхэд эмэгтэйчүүдийн эрхийг хамгаалах олон нийтийн болон улсын төсвийн байгууллагууд судлан тогтоох цаг болжээ.