ХААН Банкны Тогтвортой хөгжлийн газрын захирал М.Мандахмягмартай тогтвортой хөгжил, нийгмийн хариуцлагын хүрээнд хийж буй ажлуудынх нь талаар ярилцлаа.

-ХААН Банк Тогтвортой хөгжлийг яагаад чухалчилж авч үздэг гэдгээр яриагаа эхэлье?

-Тогтвортой хөгжлийн бодлого ярихаас өмнө нийгмийн хариуцлагын үйл ажиллагааныхаа тухай танилцуулъя. Компанийн нийгмийн хариуцлага гэдэг ойлголт 2000 оны үеэс Монголд дэлгэрч эхэлсэн. Тухайн үед л ХААН Банк дотоод буюу ажилтнуудынхаа нийгмийн асуудлыг шийддэг, татвараа цаг тухайд нь төлдөг, хуулийн хүрээнд үйл ажиллагаа явуулдаг байсан, одоо ч тэр жишгээр явж байна. Харин компанийн нийгмийн хариуцлагыг системтэй, үр дүнтэй хэрэгжүүлэх зорилгоор 2007 оноос дэргэдээ ХААН Банк санг байгуулж байлаа. Энэ хүрээнд бодитой, үр дүнтэй олон төсөл, хөтөлбөр хэрэгжүүлж, өнөөдрийг хүртэл нийт 10 тэрбум төгрөг зарцуулаад байна. Дэлхий даяар яригдаж эхэлсэн Тогтвортой хөгжлийн 17 зорилго руу яаж бид уялдаж ажиллах вэ гэдэг санал, санаачилгууд 2018 оноос гарч, нийгмийн хариуцлагын үйл ажиллагаануудаа илүү тэлснээр банкныхаа дотоод үйл ажиллагааны түвшин бүрд тогтвортой хөгжлийн зорилгыг нийцүүлэн ажиллаж эхэлсэн.

Ингээд 2019 онд тогтвортой хөгжлийн ажлын хэсгийг байгуулан, жил болгон банкны үйл ажиллагааны жилийн тайлангаас тусдаа тогтвортой хөгжлийн тайлан гаргадаг болсон. 2020 онд манай банк дотооддоо дагаж мөрдөх Тогтвортой хөгжлийн бодлогоо баталж, энэ дагуу олон үйл ажиллагаа зохион байгуулж байна. Загварчлалаа тодорхой болгож, дотоод үйл ажиллагаа, шийдвэр гаргалтууд, бизнесийн хөрөнгө оруулалтуудтай уялдуулах, ТУЗ болон гүйцэтгэх удирдлагын, нийт ажилтнуудын түвшинд ойлголтоо нэгтгэх зэргээр маш олон ажил зэрэг хийгдээд явж байна.

-Тогтвортой хөгжлийн чиглэлээр тогтмол хийдэг, уламжлал болсон үйл ажиллагаанаасаа дурдвал?

- Ер нь Тогтвортой хөгжлийн чиглэлээр дотоод, гадаадын олон хөтөлбөр тогтмол хэрэгжүүлдэг. Үндэсний хэмжээний форум, чуулган, уулзалтад оролцож, сайн туршлага хуваалцсаар байна. Жил бүрийн намар бид шинэ оюутнуудад зориулсан томоохон үйл ажиллага хийдэг. Өнгөрсөн 9-р сарын 23-нд энэ жилийн “RISE-шинэ оюутны хөгжлийн хөтөлбөр”-ийн нээлтээ хийлээ.

Бид энэ хөтөлбөрийг 2018 онд анх эхлүүлж байсан. Анх удаа оюутан болоход ялангуяа орон нутгаас оюутан болж хотод ирдэг хүүхдүүдэд маш их сорилт бэрхшээл тулгардаг шүү дээ. Ямар бэрхшээл хамгийн ихээр тулгарч байна, үүнийг яаж шийдвэрлэх вэ, оюутны 4 жилд амжилттай үр бүтээлтэй сурахад нь ямар чадварууд хэрэгтэй байна вэ гэдгийг судлаад яг хэрэгтэй мэдлэг, мэдээллийг нь нэг дор өгөх зорилготойгоор хөтөлбөрийг анх эхлүүлж байлаа.

ХААН Банк сан RISE шинэ оюутны хөгжлийн хөтөлбөрөө зургаа дахь жилдээ амжилттай хэрэгжүүлж байна. Энэ жилийн хөтөлбөрийн нээлтэд 800 орчим оюутан ирсэн. Жил жилийн намрын хамгийн олон оюутан цуглардаг, хүлээлт үүсгэдэг хөтөлбөр болсон. Хөтөлбөрийн хүрээнд залуус шинэ хүрээлэл үүсгэж, нийгэмдээ манлайлж буй залуу манлайлагчидтай чөлөөтэй ярилцаж, мэдлэг чадвараас нь суралцаж нэг өдрийг хамтдаа өнгөрүүлдэг уламжлалтай. Гэхдээ зөвхөн нэг өдрийн арга хэмжээ бус цаашдаа бүтэн жилийн хугацаанд төрөл бүрийн хөгжлийн хөтөлбөрт хамрагддаг. Нээлтийн үйл ажиллагаанд орж чадаагүй ч RISE шинэ оюутны хөгжлийн хөтөлбөр 2023-2023 группт нэгдээд хэрэгцээтэй мэдээллээ авах боломжтой гэдгээрээ онцлог юм. Хөтөлбөрт хамрагдсанаар оюутнууд дараагийн жилүүддээ яаж амжилттай сурах, сургуулиас гадуур яаж өөрийгөө хөгжүүлэх, нийгэмд яаж байр сууриа олох вэ гэдэгт тусалж байгаа хэрэг юм.

-Энэхүү арга хэмжээний гол ач холбогдол нь юу гэж харж байна?