Бугширмал асуудалдаа живж агаарын бохирдлооос үүдэн угаартаж 40, 50-иараа амиа алдацгаах хөөрхий Улаанбаатар хотынхны хүйтэн өвөл, харанхуй айдас, хорт утааны аюул тосдогоороо угтлаа. Гэвч өвлийн улирал эхлээгүй байхад халуун намраар хариуцсан дарга нь автобусны шинэчлэлээр бургилсан хулгайн хэргээр шалтгаалан үүрэгт ажлаасаа чөлөөлөгдөж оронд нь хууль зүйн сайд, “бүхнийг чадагч” Х.Нямбаатар мориллоо. Гэвч мань хүнд хотын удирдах ухаан дутмаг байгааг эхний шийдвэр,мэдэгдлүүд нь харуулжээ. Томоохон албан тушаалын гэмт хэргүүдтэй шийдвэртэй тэмцдэг гэгдэж байсан түүнийг хотын даргын ажлыг чадна гэж бодсон нь үнэндээ авлигалын баалсан идээ бээрийг шахна гэхээсээ илүү хотын менежмэнтийн асуудал руу ийм хурдан дайрч ороод люмпэн ухаанаараа гайхуулна гэж хэн санахав.

Нийслэлийн төлөвлөлтийг цоо шинээр дахин зураглах чадварлаг инженерийн шийдэл дутагдаж байгаа нь гарцаагүй. Харин улс төрч нар хэзээ ч инженерүүд шиг ажиллаж чадахгүй бөгөөд тэд зөвхөн популист арга барилаа түрүүнд тавьдаг.