2022 оны 11 сард 3413 төгрөгтэй тэнцэж байсан Америк долларын ханш 2023 оны 11 сарын 21 гэхэд 3439 төгрөгтэй тэнцэж байна. Эдийн засгийн эргэлт, мөнгөний урсгал арай ч амь тавчихгүй судас нь лугшсаар ч 2023 оны 3 сард 3500 долларт хүрч түүхэнд байгаагүйгээр төгрөгийн ханш суларч, доллар чангарсан нь Монголын эдийн засгийн бодит өсөлт хөрсөн дээрээ буухгүй байгааг нотолно.

Монгол Улсын гадаад валютын нөөц 2023 оны 10-р сарын байдлаар 3977 сая ам.доллар болж 2021 оны 4 сард 4891 сая ам доллар байсан үзүүлэлтээс ийнхүү буурсан нь төгрөгийн ханшийн сулрал, үнийн хөөргөдөлд ихээхэн нөлөөлж байна. Огцом хурдтай муудаж байсан эдгээр үзүүлэлтүүд бага зэрэг өсөлт үзүүлэх болсон нь Монгол Улс нүүрсний экспортоо нэмэгдүүлж, тээвэрлэлтийн асуудалд дэвшил гарсантай холбоотой гэж дүгнэгдэж байна.

Харин иргэдийн худалдан авах чадвар өдрөөс өдөрт доройтож импортын хүнсний барааг худалдаж авах чадвартай иргэдийн тоо эрс буурчээ.

Хүнсний дэлгүүрүүдэд мах, гурил, будаа, дайвар жижиглэнгийн бүтээгдэхүүнээ уут, кг-аар нь бус граммлаж ширхэглэн авч өдрийн хүнсээ залгуулах хүмүүс захаасаа аваад буйг бодит байдал илэрхийлж байна. Төгрөгийн ханш сул хэвээр энэхүү байдал цалин, тэтгэврийн доод хэмжээг механикаар арга саамын төдий нэмэгдүүллээ ч эдийн засагт эерэг өөрчлөлт авч ирж чадахгүй байна. Нэг сая төгрөгийн бодит үнэлгээ одоогийн ханшийн нөхцөлд 500 мянган төгрөгийн чансаанд хүрэхгүй байна.