Нийтлэлч Б. Болор-Эрдэнэ: “...ГХО нь тэгэхээр гадаадын этгээд 10 төгрөгөө 11 болгох зорилгоор 10 төгрөгөөрөө(эсвэл түүнтэй дүйцэх хөрөнгөө өгч) манай бондыг авах, эсвэл хүүтэй зээл болгох, эсвэл компанийн хувьцаа авах зэргийг хэлж байна.

Нэгдүгээрт гадаадын хөрөнгө оруулалт бол Монголчууд бүх итгэл найдвараа өгөх ямар нэг тусламж сайхан сэтгэл эсвэл аврал энэрэл бус. Ердөө л гадаадын аль нэг мөнгөтэй хөрөнгө оруулагч өөрт ашигтай ямар нэг зүйлд хөрөнгөө оруулж эргүүлээд өөртөө ашигтайгаар буцааж хөрөнгөө авах л үйл ажиллагаа.

Үр дүнд нь Монголын эдийн засагт эерэг өөрчлөлт гарах эсэх нь яг тухайн хөрөнгө оруулагчид төдийлөн хамааралгүй ч байж болно. “Өөрийн хөрөнгөө буруу зарах тусам нь ГШХО-ын үнэ цэнэ улам нэмэгдэнэ, нэмэгдэх тусам нь хамаарал нэмэгдэнэ, хамаарал нэмэгдэх тусам шүтлэг нэмэгдэнэ, энэ цикл улам гүнзгийрч ирэв.

Уг нь 20 хүнд ажил олгоод дунд зэргийн үйлдвэр босгочих 100 мянган доллар бензиний мангаст хувиргаж, өөрийн хөрөнгөө энд тэндхийн үл хөрвөх хөрөнгөнд хуваарилсан атлаа хөл дээрээ тэнцэж ядаж байгаа хэдхэн хувьцаат компаниасаа нэг ширхэг хувьцаа авч үзээгүй гарууд, эсвэл дотоодын хөрөнгө идэвхтэй эргэх бүтэц бүрдүүлэх боломж гарт нь байсаар байтал хийхгүй байгаа хүмүүс...ер нь эхлээд өөрийн чадах хөрөнгийн хуримтлал, бүтээлч инвестмэнт, түүнийг сайжруулахын төлөө ямар нэг юм хийхгүй хүмүүс(эрх мэдэлтэй, боломжтой тусмаа) цөмөөрөө энэ гурван үсгээр гоёж, эх орны данс тооцоонд аягүй санаа зовсон дүр үзүүлж, ГШХО уналаа, улс сөнөлөө гэж халаглах хоор дууны эгнээнээс гарвал зохино.”