Шударга ёс бол хүн төрөлхтний мөнхийн тэмүүлэл. Улс эх орон, эрх зүйт төрийн тогтолцоо, Үндсэн хууль ч шударга байдлын төлөө чиглэдэг. Ардчилал бол хүний эрхийн шударга ёсны зарчим, эрх чөлөөний өгөгдлүүд. Гэтэл нийгмийг хорт хавдар шиг өвчлүүлдэг авлигал, төрийн өндөр албан тушаалтнуудын гэмт хэргийн тогтолцоо ард түмний гэгээлэг ирээдүйд тэмүүлэх бүх талын эрмэлзлийг давтан мохоож эцэстээ үр хүүхдэдээ эх орноо яаж бүрэн бүтэн үлдээх талаар толгой гашилгахад хүргэжээ.

Уг нь тусгаар тогтнолоо батлан хамгаалахаас өгсүүлээд ард түмнээ амгалан тайван амьдруулах үүрэг төрийн тогтолцооны зорилго чиглэл болох ёстой. Гэтэл төрийн албыг бизнесээ өргөжүүлэх, хувьдаа баяжих, эрх мэдлийг мафи сүлжээ үүсгэхэд ашигладаг увайгүй үйлдлийн дэвсгэр болгосон нь туйлын харамсалтай.

Тогоо нь уруугаа харсан ийм байдалд шударга ёсыг сахиж, хууль дүрмээрээ асуудалд хандаж, үндэстнийхээ алс ирээдүйд санаа зовниж, бодит алхам хийсэн нь эргээд өөрсөд дээрээ шийтгэл хүлээдэг шорон гянданд хоригдох, шийдвэр гаргалтын хохирол амсацгаадаг болжээ. Ардчиллын хамгийн эрүүл, дархлаа сонгууль хүртэл хуйвалдаан, мөнгө, хууран мэхлэлт дээр тогтох болж, шударгаар үнэнийг ярьсан болгонд шүүхийн тогтоолтой үгүйгээр баривчлагдах өдөр хүлээгддэг болчхов уу?

Д.ЭНХБАТ