НИТХ-ын ээлжит бус II хуралдаан боллоо. Хуралдаанаар нийслэлийн 2025 оны төсөв, Авто тээврийн болон өөрөө явагч хэрэгслийн албан татварын хувь хэмжээг шинэчлэх, Авто зам ашигласны төлбөрийн хэмжээг шинэчлэх зэрэг асуудлыг танилцуулж, нийслэлийн газар зохион байгуулалтын төлөвлөлөөг хэлэлцлээ.

Улаанбаатар хотын Захирагч Х.Нямбаатар "НИТХ-ын 2024 оны хоёрдугаар сарын 8-ны өдийн долдугаар тогтоолоор авто тээврийн болон өөрөө явагч хэрэгслийн албан татварын хувь хэмжээг шинэчлэн тогтоохдоо автобусны татварын хувь хэмжээг бууруулан, цахилгаан тэжээлт автомашины татварын хувь хэмжээг 0 хувь байхаар тогтоож, бусад авто тээврийн болон өөрөө явагч хэрэгслийн хувьд 2010 оноос хойш татварын хувь хэмжээнд ямар нэг өөрчлөлт оруулаагүй 14 жил болсон байна. Мөн тухайн өдрийн ИТХ-ын тогтоолоор нийслэлийн автозам ашигласны төлбөрийг шинэчлэн тогтоохдоо 4000см3-с дээш суудлын автомашины зам ашиглалтын төлбөрийн хэмжээг 10 мянган төгрөгөөр нэмэгдүүлж, бусад тээврийн хэрэгслийн хувьд төлбөрийн хэмжээг 2013 оноос хойш ямар нэгэн өөрчлөлт оруулаагүй. Авто тээврийн болон өөрөө явагч хэрэгслийн албан татвар авто зам ашигласны төлбөрийн хэмжээг хууль тогтоомжийн хүрээнд нэмэгдүүлэн тогтоосноор нийслэлийн авто замын сүлжээг сайжруулах өргөтгөн шинэчлэх, түгжрэлийг бууруулах авто замын арчлалт, урсгал засвар техник технологийг шинэчлэхэд зарцуулах, нийслэлийн замын сангийн засварын эх үүсвэр нэмэгдэж, авто замын ачаалал түгжрэлийг бууруулахад эерэг нөлөө үзүүлнэ. Ирэх онд авто тээврийн болон өөрөө явагч хэрэгслийн албан татварыг 2-3 дахин, зам ашигласны төлбөрийг 5 дахин нэмэгдүүлэн тогтоосноор нийслэлийн замын сангийн орлого эх үүсвэрийг 151.5 тэрбум төгрөгөөр нэмэгдүүлэхээр төсвийн төсөлд тусгалаа" гэлээ.

Улмаар маргааш нийслэл дэх АН, МАН-ын бүлэг хуралдаж, үүний дараа буюу 12 дугаар сарын 4-нд ээлжит бус II хуралдааныг хийхээр товлосноор завсарлалаа.