Сангийн сайд Б.Жавхлан өчигдөр (2024.12.03) УИХ-ын МАН-ын бүлэгт, Сангийн яамны Төрийн нарийн бичгийн дарга Ж.Ганбат АН-ын бүлэгт 2025 оны төсвийн төслийн танилцуулгыг хийсэн.

Засгийн газар өнөөдөр (2024.12.03) 14.00 цагт хуралдаж, 2025 оны Төсвийн тухай хуулийн төслийг хэлэлцэн, УИХ-д өргөн мэдүүлэх юм байна.

Ерөнхий сайд Л.Оюун-Эрдэнэ Саудын Арабын Хаант Улсад зохиогдож буй Цөлжилттэй тэмцэх тухай НҮБ-ын конвенцын Талуудын 16 дугаар бага хуралд оролцож буй тул энэхүү хуралдаанд цахимаар оролцохоор болжээ.

Ерөнхийлөгч 2025 оны төсөвт бүхэлд нь хориг тавьсантай холбоотойгоор төсвийн зарлагыг 1.9-2.4 их наядаар бууруулах шаардлага үүссэн.

УИХ дахь МАН-ын бүлэг иргэдэд олгодог цалин, хүүхдийн мөнгийг хасахгүй байх улс төрийн шийдвэр гаргасан тул ирэх жил төрийн албан хаагчдын цалингийн зургаан хувийн нэмэгдэл болон хүүхдийн мөнгө тэтгэмжийг хэвээр олгох юм байна.

Сангийн сайдын танилцуулснаар, төсвийг 833 тэрбумаар, гадаад зээлийн ашиглалтыг 211.6 тэрбумаар, нийт 1.4 гаруй их наяд төгрөгөөр буулгахаар тооцжээ. Төсвийн тэнцлийн өөрчлөлтөөр тэнцвэржүүлсэн тэнцлийг 1.9 их наядаар, суурь тэнцлийг 1.7 их наядаар нэмэхээр болсон байна.

Төсвийн орлогыг 0.5 их наядаар, урсгал зардлыг 1.4 их наядаар, улсын төсвийн хөрөнгө оруулалтыг 0.8 их наядаар, гадаад зээлийг ашиглалтыг 0.2 их наядаар хасаар тооцжээ.

Сангийн сайд УИХ дахь намын бүлгийн гишүүдэд урсгал зардлаас 1.4 их наяд, хөрөнгийн зардлаас 0.8 их наяд, гадаад зээлийн ашиглалтад 0.2 их наяд гэх мэт нийт 2.4 их наяд төгрөг хасах саналыг танилцуулсан байна.

Эх сурвалжуудын мэдээлж буйгаар, Сангийн сайд, ЗГХЭГ-ын дарга нар сайдуудтай нэг бүрчлэн уулзаж, төсвийн талаарх асуудлуудаа нэг мөр болгож байгаа аж. Эхний ээлжид шинээр авах тавилга, шинэ хөрөнгө оруулалтуудыг хасч, сайд нарын багц тус бүрийг 10-20 хувиар танах бололтой.

Орон нутгийн төсвийг багасгах бөгөөд аймгуудын орон нутгийн хөгжлийн санд хуваарилдаг мөнгөн дүнгийн 10-20 хувийг танахаар төлөвлөсөн байна. Мөн Ч.Номин сайдын “дуулиант 18.3 тэрбум төгрөг”-ийн ваучераас гадна ирэх онд хуулиар бий болох байсан шинэ орон тоонуудыг хойшлуулахаар төлөвлөж байгаа аж.

Б.ЖАРГАЛ