УИХ-ын гишүүн С.Цэнгүүн цаг үеийн асуудлаар байр сууриа илэрхийлжээ. Тэрбээр "Монголын том төслүүдийг хөдөлгөх гэсэн оролдлого бүрийг элдэв айдсаар удирдаж гацааж ирсэн. Монголын эдийн засагт үр ашиггүй төслийг шаардлагагүй гэж хэлснийг нь эсэргүү болгосон.

Монгол Улс баян, иргэд нь чинээлэг болох ёстой. Эдийн засгийн эрх чөлөөгүй бол бусад бүх асуудал шийдэгдэх боломжгүй. Монгол харин эдийн засаг нь хаалттай, иргэд нь халамжаас хараат байх хэнд ашигтай вэ? Одоо байгаа систем нь зөв байсан юм бол яагаад жил бүр гадагшаа иргэд нь дайжаад байгаа юм бэ?

Одоо байгаа систем нь зөв байсан бол яагаад хэдэн цагаар тог тасардаг болоод байгаа юм бэ? Өөрчлөлт хийж, хувьсан өөрчлөгдөж чадахгүй бол бид өөдлөхгүй. Энэ улсад тэсч үлдэх хүн олдохгүй. Бүгд муулуулахаас айж, бэртэгчин царайлж ойлгож байгаа ч дуугарахгүй өнгөрсөөр бид өнөөдөр ийм өрөвдөлтэй байдалд орсон.

Бодсоноо хэлж, хэлснээ хийхийг хичээхэд айж ичих зүйл байхгүй. Улс төрд хүн зарчмаараа явж болдог гэдгийг харуулмаар байна. Одоо ойлгогдохгүй ч хожим нь нийгэм урагшилсан байх тэр цэгийг харахыг зорьж байна.

Тэр замд эрчим хүчний реформыг амин хувийн эрх ашиг мэтээр гуйвуулан мушгих гэж оролдох аж. Би хэн нэгний заавар үгээр биш, эрх чөлөөтэй хүн. Миний гэр бүл намайг өсгөхдөө учиргүй баян цатгалан биш ч хүнээс юм гуйхгүй, хүний өмнө айх айдасгүй өсгөсөн. Түүний үр дүнд өөрийн сонголтоор улс төрд яваа. Төсөөлж байгаа шиг нь өчүүхэн жижигхэн эрх ашиг, нэр хүнд хайж улс төрд ороогүй. Санаа зоволтгүй, сайн цаг ирнэ" гэжээ.

Б.ЖАРГАЛ