Монгол Улсын Ерөнхий сайд Лувсаннамсрайн Оюун-Эрдэнэ 2024 оны аравдугаар сарын 31-ний өдрийн захирамжаараа Дундговь аймгийн Засаг даргаар Самданнямын Мөнхчулууныг томилсон.

С.Мөнхчулуун 2024 оны аравдугаар сарын 31-ний өдөр үүрэгт ажлаа хүлээн авч, төр засгийн бодлого шийдвэрийг орон нутагт хэрэгжүүлж, ард иргэдийнхээ эрх ашгийг хангаж ажиллахаа илэрхийлсэн. Тэрбээр төрсөн нутгаа гэсэн сэтгэлээр ажиллаж байгаад нутгийн олон нь ам сайтай байгаа аж.

Тэрбээр шинэ жилийн баярын өдөр цахилгаан, дулаанаар ханган ажиллаж, ээлжийн үүрэг гүйцэтгэж буй "Дундговь-Ус" ОНӨААТҮГ, "Говь дулаан түгээх" ХХК, "Падайма" ХХК, "Ган-Илч" ХХК, Дундговь Цахилгаан түгээх сүлжээ салбар, "Цахилгаан дамжуулах үндэсний сүлжээ" ТӨХК-ийн Говийн бүсийн салбарын албан хаагчдад аймгийн Засаг дарга С.Мөнхчулуун, Засаг даргын орлогч Ц.Ариунбаяр, Засаг даргын Тамгын газрын дарга Б.Лхагвабаатар нарт шинэ оны мэнд хүргэж, баярын бэлэг өгсөн байна.

Дашрамд сонирхуулахад, Дундговьд Мөнхчулуун нэртэй хүн их байдаг бололтой. Дундговь аймгийн Засаг дарга С.Мөнхчулуун цахим хуудастаа “Хүмүүс надад "Танай хурлын дарга та хоёр ижил нэртэй, сонин юм" гээд байх юм.

Тэгэхээр нь би хэллээ. Иргэдийн төлөөлөгчдийн хурлын дарга Ж.Мөнхчулуун, Үйлдвэрчний эвлэлийн хорооны дарга Б.Мөнхчулуун, зурагчин Э.Мөнхчулуун.

Тэр юу ч биш, арванхоёрдугаар сарын 29-нд ИТХ дарга Ж.Мөнхчулуун бид хоёр төрийн шагнал гардуулсан чинь шагнал авч байгаа хүн нь Сайнцагаан сумын өндөр настан Ц.Мөнхчулуун байлаа” гэж бичжээ.

Б.ЖАРГАЛ