АНУ-ын нэгэн хууль тогтоогч бямба гарагт “АНУ, Оросын албаны хүмүүс ойрын өдрүүдэд Саудын Арабад уулзаж, Украинд гурван жил шахам үргэлжилж буй дайныг зогсоох хэлэлцээг эхлүүлнэ” гэж мэдэгджээ.

Украины Ерөнхийлөгч Владимир Зеленский өнгөрсөн баасан гарагт Германд АНУ-ын дэд ерөнхийлөгч Ж.Д.Вэнстэй уулзаад, "Саудын Арабад болох хэлэлцээнд Украиныг уриагүй. Киев стратегийн түншүүдтэйгээ зөвлөлдөхөөс өмнө Оростой харилцахгүй” гэж мэдэгдсэн байна.

АНУ-ын төлөөлөгч Майкл Маккаул “Ройтерс” агентлагт мэдээлэхдээ “АНУ-ын Төрийн нарийн бичгийн дарга Марко Рубио, Үндэсний аюулгүй байдлын зөвлөх Майк Вальц, Цагаан ордны Ойрхи Дорнодын асуудал эрхэлсэн төлөөлөгч Стив Виткофф нар Саудын Арабыг зорино” гэжээ. Гэвч Оросоос ямар төлөөлөгчид ирж яриа хэлэлцээ хийх нь одоогоор тодорхойгүй байгаа аж.

Мюнхений аюулгүй байдлын бага хурлын үеэр Маккаул “Яриа хэлэлцээний зорилго нь АНУ-ын Ерөнхийлөгч Дональд Трамп, ОХУ-ын Ерөнхийлөгч Владимир Путин, Зеленский нарын уулзалтыг зохион байгуулж, "эцэст нь энх тайвныг тогтоож, энэ мөргөлдөөнийг эцэс болгох юм” гэж мэдэгджээ.

Саудын Арабад АНУ, Оросын албаны хүмүүс хэлэлцээ хийхээр төлөвлөж буйг өөр нэг эх сурвалж баталсан байна. АНУ-ын Төрийн департамент энэ талаар тайлбар өгөх хүсэлтэд даруй хариу өгөөгүй ажээ.

Өнгөрсөн нэгдүгээр сарын 20-нд албан тушаалдаа орсон Трамп Украины дайныг нэн даруй зогсоохоо удаа дараа амалсан. Тэрбээр лхагва гарагт Путин, Зеленский нартай утсаар ярьсан нь "Вашингтон Европын холбоотнуудыг энхийн үйл явцад оролцуулахгүй нь" хэмээн түгшихэд хүргэжээ.

Эх сурвалж: REUTERS
Б.ЖАРГАЛ