Олон улсын авиакомпаниуд алдаа гаргавал зорчигчдод нөхөн төлбөр олгож, тэдний сэтгэл санааны хохирол болон алдагдсан цаг хугацааны төлбөрийг төлдөг. Гэтэл МИАТ компани алдагдалтай ажиллаж, дээр нь үндэсний гэж иргэд, төр засгаараа хайрлуулах тусам хариуцлага алдаж, нэг ёсондоо удирдлагуудынх нь чих нь хэт хатуурсан уу нэг сарын зайтай 2 ч удаа онгоцонд нь техникийн алдаа гарлаа. Баримтаас харахад, МИАТ ТӨХК сүүлийн 2 сард 2 ч удаа эрсдэлтэй нислэгүүд үйлдэж, хүний амь насаар дэнчин тавьж байна. Энэ хав дараад өнгөрдөг асуудал огт биш.

Өөрөөр хэлбэл, 07.11-ний өдөр Улаанбаатар- Бээжин чиглэлийн ОМ-223 дугаартай 18.00 цагт Улаанбаатараас хөөрч, 20.10 цагт Бээжинд буух байсан нислэг агаарт хөөрөөд 10 минут болсны дараа онгоцны техникийн алдааны улмаас буцаж Улаанбаатар хотод газардсан байдаг.

Тухайн үед гадаадын цааш өөр улс руу нисэх зорчигчид ихээхэн бухимдаж, онгоцоо шалгаад нисдэггүй юм уу, дахин Монголын онгоцоор нисэхгүй гэж бухимдаж байсан аж. Гэтэл юу ч болоогүй юм шиг онгоцондоо суу гээд өөр онгоцонд 1 цаг 30 минутын дараа суулгахдаа, МИАТ-ынхан зорчигчдоос хүлцэл өчдөггүй, бараг л болох ёстой юм болсон юм шиг бүдүүлэг авирладаг болжээ.

Ер нь МИАТ-ын үйлчилгээ улам бүдүүлэг болоод байгааг МИАТ-аар нисдэг хүн бүр хэлдэг. Харин бусад авиакомпаниуд тэр дундаа Эйр чайна, Кореан Эйрлайн компаниуд үйлчилгээ ямар түвшинд байж, үйлчлүүлэгч бүрийг хэрхэн хүндэтгэн харьцдагийг онгоцоор тогтмол нисдэг иргэд бүгд мэднэ. Гэтэл техникийн асуудлаар хөөрөөд буудаг, талхан дунд хавчуулсан хиам огурцы өгөөд Кореан Эйрлайнсын онгоц шиг үнэ авдаг МИАТ-ын үйлчилгээг эрс өөрчлөхгүй бол энэ чигээрээ байвал энэ улсын нэр хүнд, жуулчдыг татах Засгийн газрын бодлогод нь сөргөөр нөлөөлөх биз.

МИАТ-ын үйлчилгээ, харилцааны асуудал бүүр гуравдахь асуудал гээд орхиё. Харин тэд 2025.08.04-ний өдөр Токио-Улаанбаатар чиглэлийн онгоц А/Системд алдаа гарсны улмаас түлшээ агаарт багасган, Осакад шуурхай газардах болсон. Мөн л техникийн саатал алдаа гээд өнгөрдөг болж. Цаашид сарын зайтай гарч буй гэнэтийн буултууд осол болон хувирах вий дээ.

Хүний амь насыг тээж яваа хариуцлагатай үйлдэлд хариуцлагагүй хандаж буй МИАТ-ын энэ алдаануудыг ярих цаг болсон байна. Зорчигчдын зүгээс гомдол гаргадаг ч тэдний үгийг сонсоод л өнгөрдөг, арга хэмжээ авдаггүй, тэмдэглэл ч хөтөлдөггүй энэ хэнэггүй байдалд хэн хариуцлага хүлээх бэ. Гадны улс орнуудад энэ байдлыг компанийн удирдлагатай ярих хэмжээний асуудал.

Саяхан Монгол Улсын Ерөнхий сайд Г.Занданшатар Төрийн өмчит компаниудын өндөр цалинтай дарга нарын асуудлыг хөндсөн. Тэгвэл өндөр цалин хангамжтай МИАТ-ын удирдлагуудын хариуцлагын асуудал, нэг сарын зайтай 2 удаа гарсан онгоцны гэнэтийн доголдлыг сөхөх цаг нэгэнт болсон байна. Энэ талаар бид эргэн мэдээллэнэ.