Монгол Улсын төмөр замын салбарын түүхэнд "онцлох" шинэчлэл хийж, "Монголын төмөр зам" ТӨХК “hybrid” буюу хосолсон хөдөлгүүртэй анхны зүтгүүрээ албан ёсоор хүлээн авав. Энэ нь ОХУ-д үйлдвэрлэсэн, ашиглалтын хугацаа 2014 онд дуусан, хадгалж байсан 2ТЭ116-2001 загварын зүтгүүр юм.

БНХАУ-ын болон "Монголын төмөр зам" ТӨХК-ийн Зүтгүүрийн аж ахуйн хэлтсийн инженер, техникийн ажилчид нэг жилийн хугацаанд хамтран иж бүрэн шинэчилж, орчин үеийн хосолсон хөдөлгүүрийн системээр тоноглосон байна.

Тус зүтгүүр 440 Kв чадалтай 2 ширхэг батарей хөдөлгүүр, 400 Kв чадалтай 2 ширхэг дизель хөдөлгүүрээс бүрдэж, нийт 1680 Kв чадлыг гаргадаг. Дизель хөдөлгүүрийг нь ашиглахгүйгээр батарей хөдөлгүүрээр бүрэн ажиллах боломжтойгоороо онцлогтой аж.

“Монголын төмөр зам” компаниас "Шинэчилсэн “ECO” зүтгүүр түлш зарцуулалтыг 60-70 хувиар багасгахын зэрэгцээ хорт утаа ялгаруулдаггүй, байгальд ээлтэй ногоон технологи бөгөөд эдийн засгийн үр ашигтай" гэж мэдээлэв.

Б.ЖАРГАЛ