ХБНГУ-ын канцлер Фридрих Мерц "ОХУ-ын эхлүүлсэн Украины эсрэг дайныг зогсоохын тулд хүчин чармайлт гаргахдаа, эдгээр хоёр улсын Ерөнхийлөгч Владимир Зеленский болон Владимир Путин нарын биечилсэн уулзалт болохгүй гэдгийг ойлгож, ийм нөхцөлөөс хандах ёстой" гэж мэдэгджээ. Тэрбээр энэ мэдэгдлээ наймдугаар сарын 28-ны пүрэв гарагт Францын Ерөнхийлөгч Эммануэль Макронтой уулзах үеэрээ хэлсэн байна.

Мерц дипломат хүчин чармайлтаа үргэлжлүүлэх тухай ярихдаа “Бид энэ сэдвийг дахин хөндөх ёстой ч Ерөнхийлөгч Зеленский, Ерөнхийлөгч Путин нарын уулзалт тодорхойгүй, болохгүй нь илт байна” гэж онцолсон байна.

Түүний хэлснээр, энэ нөхцөл байдал нь "өнгөрсөн долоо хоногт Ерөнхийлөгч Трамп болон Ерөнхийлөгч Путин нарын хооронд тохиролцсон зүйлээс эрс ялгаатай" бөгөөд Трамптай Вашингтонд хийсэн уулзалтын үеэр ч энэ сэдэв хөндөгдсөн гэнэ.

Берлин амжилттай яриа хэлэлцээ болох магадлалд эргэлзэж байна

Дональд Трамп өнгөрсөн долоо хоногийн эхэнд Владимир Путинтэй утсаар ярьсны дараа хоёр улсын төрийн тэргүүн нарын уулзалтын төлөвлөгөө боловсруулагдаж байгаа талаар мэдээлсэн. Харин Кремль зөвхөн хэлэлцээ хийх төлөөлөгчдийн түвшинг нэмэгдүүлэх боломжтой гэсэн байр суурь илэрхийлсэн байна.

Мерц өмнө нь Москва уг уулзалтыг зарим урьдчилсан нөхцөлтэй холбон, "цаг хожих стратеги" ашиглаж байна гэж мэдэгдэж байв. Тэрбээр “Путин энэ уулзалтыг урьдчилсан нөхцөлтэй уях нь зүйтэй гэж үзэж байгаа ч эдгээр нөхцөл нь Украины талаас болон бидний, миний хувийн байр сууриинаас огт хүлээн зөвшөөрөх боломжгүй” гэж онцолжээ.

Энэхүү байр суурьтай ижил санааг ХБНГУ-ын Гадаад хэргийн сайд Йоханн Вадефуль ч илэрхийлсэн байна. Тэрбээр "Focus" сэтгүүлд өгсөн ярилцлагадаа “Ойрын ирээдүйд ОХУ ба Украин хоёрын хооронд яриа хэлэлцээ болох эсэхэд би маш их эргэлзэж байна” гэж хэлжээ.

Эх сурвалж: DW
Б.ЖАРГАЛ