Архангай, Баян-Өлгий, Говь-Алтай, Увс, Ховд, Хөвсгөл гэх зургаан аймгуудад ахуйн зориулалтаар тарвага агнах зөвшөөрөл олгосон байна. Тодруулбал, Байгаль орчин, уур амьсгалын өөрчлөлтийн сайдын тушаалаар батлагдсан тоо хэмжээг үндэслэн дээрх аймгуудад наймдугаар сарын 20-ны өдрөөс тарвага агнах зөвшөөрлийг ирэх аравдугаар сарын 15-ны өдрийг хүртэл олгожээ.

Ахуйн зориулалтаар тарвага агнах зөвшөөрлийг Зөвшөөрлийн тухай хуулийн дагуу тухайн сумын Засаг дарга олгож байгаа аж. Тарваганы экологийн үнэлгээ,

• Монгол тарвага 410 мянган төгрөг
• Алтайн тарвага 460 мянган төгрөгөөр агнахаар болжээ.

Харин зөвшөөрөлгүйгээр тарвага агнасан тохиолдолд амьтны экологи-эдийн засгийн үнэлгээг хоёр дахин нэмэгдүүлж нөхөн төлбөр тооцож, торгууль оногдуулна гэж заасан байна. Мөн Зөрчлийн тухай хуульд зааснаар хууль бусаар тарвага агнасан, тээвэрлэсэн, худалдсан, худалдан авсан бол иргэнийг 300 мянган төгрөгөөр, аж ахуйн нэгж, байгууллагыг гурван сая төгрөгөөр торгодог байна.

Монгол Улсын 17 аймгийн 81 сум тарваган тахлын байгалийн голомт өндөртэй. Сүүлийн 10 жилийн хугацаанд тарваган тахал өвчнөөр өвчилсөн 20 тохиолдол бүртгэгдсэнээс есөн хүн нас баржээ. Эдгээр хүмүүсийн дийлэнх нь тарвага агнаж, өвчих явцдаа, мах дотор эрхтэнийг хэрэглэсэн, голомтот нутгаас тулам зөөвөрлөж хэрэглэх явцдаа тус өвчнөөр өвчилжээ.

Б.ЖАРГАЛ