Эдийн засгийн ухааны доктор Р.Даваадорж тоогүй төсөв инфляци, ханшийн сулрал үүсгэж, Монгол Улсыг өрөнд оруулах эрсдэлтэйг онцолж байна. Тэрбээр "Төсвийн алдагдлыг цаасан дээр бууруулаад хэрэггүй, бодит тооцоо судалгаанд үндэслэсэн байх ёстой.

Өнгөрсөн онд төсвийг алдагдалгүй баталсан ч төсөв өмнөх жилээс 9 их наядаар нэмэгдсэн нь эрсдэлтэй байдал үүсгэсэн. Ерөнхийлөгч, Засгийн газар хасалт хийсэн ч 2025 оны 3 улирлын байдлаар 2 их наядын алдагдалтай байна. Энэ алдагдал он дуусахад 3 их наяд хүрэх төлөвтэй.

Тоогүй төсөв инфляци, ханшийн сулрал үүсгэж, Монгол улсыг өрөнд оруулах эрсдэлтэй. Судлаачдын анхааруулгыг үл тоосноор ахмадууд, багш, эмч нар тэмцэлд босож байна.

Сонгуулийн өмнөх цалингийн нэмэлт бодлого нь инфляц өдөөж, бусад салбарын шүүмжлэл, ажил хаялт үүсгэсэн. Цалин нэмэхэд татвар нэмэх, эсвэл мөнгө хэвлэхээс өөр гарцгүй, энэ нь эдийн засагт сөрөг нөлөөтэй.

Боловсрол, эрүүл мэндийн салбарын ажилчдын хүнд нөхцлийг ойлгож байгаа ч улс орны санхүүгийн байдал муудаж буйг анхаарах ёстой. "Эрдэнэс Тавантолгой" ХК-ийн ашгийг зөв удирдаж чадсан бол багш, эмч нарын цалинг илүү нэмэх боломжтой байлаа. Гэвч боловсрол, мэдлэггүй парламент ийм боломжийг алдсан нь иргэдэд дарамт болж байна" гэв.

Б.ЖАРГАЛ