-УУШГИНЫ ХАТГАЛГААНЫ ЭСРЭГ ВАКЦИНЫГ ИХ БРИТАНИАС БИШ НҮБ-ИЙН ХҮҮХДИЙН САНГААС ЗАСГИЙН ГАЗРЫН МӨНГӨӨР ХУДАЛДАН АВДАГ-

Дэлхий дээр жил бүр 0-5 хүртэлх насны хүүхдүүдийн дунд уушгины хатгалгааны шалтгаантай нас баралт 1.8 сая бүртгэгдэж байгаагийн 541 мянга гаруй нь “Стрептококк пневмони” хэмээх нянгийн халдвараас шалтгаантай аж. Гэтэл, энэ нян нь 0-2 настай хүүхдийн уушгинд агуулагдаж байдаг гэдгийг судалгаагаар тогтоосон байна. Манай улсад энэ вакцин харьцангуй сүүлд орж ирсэн бөгөөд 2014 оны байдлаар дэлхийн 95 улс уг вакциныг нэвтрүүлэн хэрэглэж байгаа юм.

Манай улсад уушгины хатгааны эсрэг вакциныг 2016 онд 39.900 хүүхдэд, 2017 онд 48 мянган хүүхдэд хийсэн бөгөөд дархлаажуулалтад хамрагдсан. Үүний үр дүнд хүүхдүүдийн дунд хатгалгааны өвчлөл 40 хувиар буурсан гэсэн мэдээллийг холбогдох албаныхан гаргасан байдаг. Мөн вакцин тариулсан хүүхдийн дунд уушгины хатгаа өвчний улмаас хүүхэд эндээгүй хэмээж байв.

Мөн 2018 онд нэг тэрбум төгрөгийг улсын төсөвт тусган, Эрүүл мэндийн сайдын багцад оруулж тус оны гуравдугаар сарын 01-нээс өрхийн эрүүл мэндийн төвүүдэд хоёр, дөрөв, есөн сартай хүүхдүүдэд пневмоккийн эсрэг 13 цэнт вакциныг хийж эхэлсэн байна.

Сүүлийн үед цахим орчинд “Их Британиас арванхоёрдугаар сарын эхээр уушгины хатгалгааны вакцин ирж хүүхдүүдэд тарилга эхлэхээр төлөвлөж байсан ч ЭМЯ-ны сайдын тушааалаар уг вакциныг тарьж болохгүй гэх лабораторын дүгнэлт гарсан гэх шалтгаанаар Буриад руу зарсан” гэх мэдээлэл цацагдсан билээ.

Тус мэдээлийн дагуу бид холбогдох албаныхнаас тодруулахын зорьсон юм. ЭМЯ-ны шуурхай удирдлагын төвийн дарга Д.Нарангэрэлээс тодруулахад “Бид гадаадын ямар нэгэн улс орноос вакцин авдаггүй. Ялангуяа 0-15 хүртэлх насны хүүхдийн вакциныг НҮБ-ийн Хүүхдийн сангаас захиалгаар Засгийн газрын мөнгөөр худалдан авдаг. Уушгины өвчлөлийн эсрэг Пневмококийн вакциныг хоёр, дөрөв, есөн сартай хүүхдүүдэд хугацааных нь дагуу вакцины товлолоор хийгээд л явдаг шүү дээ. Товлол гэдэг чинь өдөр бүр хийгдэнэ гэсэн үг. Тэрнээс биш зөвхөн арванхоёрдугаар сард хийдэг гэсэн мэдээлэл буруу юм. Ор үндэслэлгүй, буруу ташаа мэдээлэлд итгэхгүй байхыг анхааруулж байна” гэсэн хариултыг өгсөн юм.

Мөн Эрүүл мэндийн сайд Д.Сарангэрэл “Тийм зүйл огт байхгүй. Уушгины хатгалгааны вакциныг Англиас огт авдаггүй, НҮБ-ийн хүүхдийн сангаас ДЭМБ-ийн сертификаттайгаар Монгол Улсдаа вакцин нийлүүлдэг. Вакцин зарна гэсэн ойлголт байдаггүй” гэлээ.

Уушгины өвчлөлийн эсрэг Пневмококийн вакциныг: хүүхэд хоёр сар хүрэнгүүт уг вакцины эхний тунг авна. Дараа нь дөрвөн сартайд хоёр дахь тун, есөн сартайд гурав дахь тунг хийнэ. Вакцины зах зээлийн үнэ нэг хүн/тун нь 13-15 ам.доллар байдаг. Харин НҮБ-ын Хүүхдийн сангийн хөнгөлөлттэй үнэ болох 3,5 ам.доллараар худалдан авдаг юм байна. Уг вакцины гурван тунг бүрэн авсан хүүхэд пневмококкоор үүсгэгдсэн уушгины хатгаа өвчний эсрэг 10-15 жилийн дархлаа тогтдог ажээ.