-ТӨРӨХ ЭМНЭЛГИЙГ 11 ДҮГЭЭР САРД АШИГЛАЛТАД ОРУУЛАХААР АЖИЛЛАЖ БАЙНА-

Бид энэ удаагийнхаа сурвалжлагаар Монгол Улсын төрийн гаж тогтолцоо бүтээн байгуулалтын ажилд хэрхэн нөлөөдөг талаар асуудал хөндөхийг хичээлээ. Одоогоос есөн жилийн өмнө Яармагийн дэнж дээр 300 ортой амаржих газар барихаар болсон. Гэвч хөрөнгө мөнгө дутуу гэх шалтгаанаар тус барилгыг найман жил “царцаасан” байдаг. Гэтэл хотын шинэ захиргааны барилгын ажил 2018 оны долдугаар сард эхэлж наймдугаар сарын сүүлээр ашиглалтад орох гэж буй нь төрийн гаж тогтолцооны илрэл юм. Өөрөөр хэлбэл дарга нар өөрсдийнхөө суух “ордон”-г ганцхан жилийн дотор ашиглалтад оруулж чадсан ч ард иргэдэд үйлчлэх эмнэлгийн төсвийн асуудлыг шийдэлгүй есөн жилийн хугацааг зарцуулсан нь тун харамсалтай.

Үе үеийн засгийн газрын тэргүүн, Эрүүл мэндийн сайдууд барилгын талбай дээр очиж “Төрөх эмнэлгийг дараа жил ашиглалтад оруулна” гэж амласаар өнөөдрийг хүрсэн гэхэд болно.

Тус эмнэлгийг барих шийдвэр одоогоос есөн жилийн өмнө буюу 2009 онд гарч, Засгийн газар, “Нийслэл өргөө” компани, “Пума консерциум”-тай гэрээ байгуулан улсын төсвөөс 17.7 тэрбум төгрөгөөр санхүүжүүлж барилгыг эхлүүлсэн. Гэтэл нэмэлт санхүүжилт шаардлагатай болсноор 2013 онд барилгын ажил зогссон юм. Харин 2017 онд Засгийн газрыг төлөөлж Үндэсний хөгжлийн газар, “Томо бюлдинг” компанитай концессын гэрээ байгуулж “царцаад” байсан барилгын ажлыг эхлүүлсэн. 300 ортой төрөх эмнэлгийн барилгын ажил өнөөдөр 80 хувьтай явагдаж байгаа аж. Одоогоор энэ эмнэлгийн барилгын бүх блокын дээвэр, Е блок, цахилгааны дэд өртөөний гурван барилга, гипсэн тааз, шал, шугам сүлжээний далд монтаж, салхивч болон сангийн шугам сүлжээний монтаж, инженерийн шугам сүлжээний ажил, гадна зам талбайг тохижуулж дуусчээ.

Эмнэлэг ашиглалтад орсноор олон улсын шаардлага хангасан 140 ортой амаржих газар, 160 ортой хүүхдийн төрөлжсөн нарийн мэргэжлийн төв бүхий эх, хүүхдийн цогц эмнэлэг ажиллаж эхэлнэ. Бид “Томо бюлдинг” компанийн ерөнхий инженер Г.Ганзоригоос бүтээн байгуулалтын ажлын явцын талаар тодруулга авлаа.

-Төрөх эмнэлгийн бүтээн байгуулалтын ажил хэдэн хувьтай явагдаж байна. 2019 оны IV улиралдаа ашиглалтад орох уу?

-Төрөх эмнэлгийн бүтээн байгуулалтын ажил өнгөрсөн намраас нэлээд эрчимтэй хийгдсэн. Дулаанаа авч чадаагүйн улмаас ашиглалтад орох хугацаа хойшилсон. Энэ жил цаг агаарын нөхцөл байдал тогтворгүй орой дулаарлаа. Гэсэн ч бид дөрөвдүгээр сараас ажлаас эхлүүлсэн. Барилгын нийт масс эзлэхүүн ихтэй учраас жавар гарахгүй нэлээд удлаа. Зуравдугаар сараас жигдрээд гадна фасад, дотор засал чимэглэлийн ажлууд хийгдээд явж байна. Барилгын явц 80 хувьтай 2019 оны IV улиралд захиалагч талдаа хүлээлгэж төлөвлөгөөтэй ч бидний зүгээс шахаад 11 дүгээр сард ашиглалтад оруулахаар ажиллаж байгаа.

-Бүтээн байгуулалтын ажилд төрөөс шалтгаалах саад бэрхшээл байна уу?

-Төрөх эмнэлэгтэй холбоотой асуудлыг ажил хэргийн шугамаар зохицуулаад явж байна. Талбайн ерөнхий инженер хувьд ажил явагдахад ямар нэгэн саад бэрхшээл алга. Удирдлага, захирлуудын түвшинд хөрөнгө оруулалтын ажил яаж явагдаж байгааг мэдэхгүй байна. Төрөх эмнэлгийн барилга нийтдээ 35 мянган метр квадрат талбай. Монгол Улсын өмнөө барих бүтээн байгуулалтын нэг гэсэн ойлголттойгоор бидний зүгээс ажлаа чанартай, түргэн шуурхай хийхээр нэлээд шахсан графиктай ажиллаж байгаа.

-Барилгын талбайд ажиллах нөөц бололцоо хангалттай байгаа юу?

-Монгол Улсад сүүлийн хоёр жилд барилгын ажил нэлээд хурдацтай хөгжиж буй учраас хүн хүчний асуудал хангалттай бус байна. Бүтээн байгуулалтын олон төслүүд зэрэг эхэлсэн учраас барилгын талбай дээр ажиллах хүн ховор байгаа. Гэхдээ бид “Хүний нөөц ховор байгаа” гээд хойш суусангүй. Бүх нөөц бололцоогоо ашиглаад талбай дээр 200 гаруй хүн ажиллаж байна.

-Ирэх 11 дүгээр сард ашиглалтад орохдоо дулаанаа ямар ч асуудалгүй авна биз дээ?

-Ямар ч асуудалгүй төвийн дулаанаа авна. Холбогдох бүх бичиг баримтаа бүрдүүлээд дулаан авах зөвшөөрлөө авчихсан байгаа. Эмнэлгийн барилга ашиглалтад ороход ямар нэгэн асуудал гарахгүй.

-Өнгөрсөн жилийн өдийд хүчил төрөгчийн хоолой татах асуудлаас болж барилгын ажил түр зогсолт хийсэн. Энэ асуудлаа шийдэж чадсан уу?

-Хүчил төрөгчийн хоолойн зохион байгуулалтаас болж барилгын ажил хойшилсон. Энэ асуудлыг дор бүрд нь холбогдох арга хэмжээг аваад бүтээн байгуулалтын ажил урагштай явагдаж байна. Шийдвэрлэх түвшний ажил 100 хувь хангагдсан. Одоо угсралт дотоод, гадаад засал чимэглэлийн ажлууд явагдаж байна .

Одоогоос олон жилийн өмнө тууү хайчлан, сүр дуулиантай шаваа тавьж байсан энэхүү эмнэлгийг иргэд бараг мартсан байх. Юутай ч олны хүлээлт болсон төрөх эмнэлэг энэ жилдээ багтаж ашиглалтад орох бололтой.

-ХОТЫН ЗАХИРГААНЫ А БЛОК НАЙМДУГААР САРД АШИГЛАЛТАД ОРНО-

Яармагийн дэнж дээр баригдаж буй төрөх эмнэлгийн барилга ашиглалтад орох гэж ЕСӨН жил дуншиж байхад хотын захиргааны шинэ барилга ганцхан жилийн дотор ашиглалтад орох гэж байна. Бид ажил хурдацтай явж байгааг буруутгах гэсэнгүй. Гагцхүү төрөх эмнэлгийн барилгыг есөн жилээр хойшлуулж нийтийн эрх ашгийг уландаа гишгэсэн үйлдлийг эргэн сурвалжижл байгаа юм.

Барилгын ерөнхий инженерийн хэлж байгаагаар бүтээн байгуулалтын ажил 60 хувьтай, наймдугаар сарын сүүлээр А блок ашиглалтад орно гэдгийг хэлж байв. Нийслэлийн нутгийн захиргааны төв цогцолборын барилгын ажлыг өнгөрсөн долдугаар сард эхлүүлсэн.

Бид "Мөнххада" авто машин худалдааны салбарын эсрэг ард талд баригдаж буй хотын захиргааны барилгын гадна ирэхэд бүтээн байгуулалтын ажил ид өрнөж байв. Хотын шинэ захиргааны барилгын ажлыг “Темпланд” компани өөрсдийн эзэмшлийн таван га газарт гүйцэтгэж байгаа. Барилгын гаднаас харахад барилга угсралтын ажил дууссан шилэн фасад хийж байгаа харагдлаа. Бид дотогш орж, мэдээлэл авах гэсэн боловч барилгын ажлыг хариуцсан инженер нь ажлаас гарсан гэх шалтгаанаар дотогш нэвтрүүлсэнгүй.

Яармагт баригдаж байгаа хотын захиргаа нь A, B, C блоктой. Нийслэлийн Хот төлөвлөлт, ерөнхий төлөвлөгөөний газраас өгсөн мэдээллээр А1 хэсэгт Иргэдийн хурлын дарга, ажлын хэсэг, бүлгийн хурлын танхимууд, хүндэтгэлийн танхим байрлана. А2 хэсэгт нь хотын музей, хүндэтгэлийн хурлын танхим, иргэдийн хурлын танхим байна. А3 Засаг даргын Тамгын газар байх юм. А4, А5 хэсэгт Захирагчийн ажлын алба байна. B блокт оффис болон хүлээн авах танхим байрлах юм. Уг блокийн барилгын ажил 2019 оны сүүл үед дуусгана. Тиймээс 2019 ондоо багтаж, нийслэлийн харъяа бүх агентлагуудыг нүүлгэхээр төлөвлөсөн. Харин С блок хурлын заал, спорт заал, нэг цонхны үйлчилгээ байхаар төлөвлөж байгаа. Гэхдээ С блокийн төлөвлөлт хараахан дуусаагүй байгаа. Шинэ төв байгуулахад урьдчилсан төсвөөр 91 тэрбум төгрөг шаардагдаж байгаа гэдгийг Нийслэлийн Хот төлөвлөлт, ерөнхий төлөвлөгөөний газрын дарга бөгөөд Улаанбаатар хотын ерөнхий Архитектор Э.Анар хэлж байсан.

Барилгын ажлыг гүйцэтгэж байгаа “Темпланд” компани өөрсдийн эзэмшлийн газраасаа таван га газрыг үнэгүй өгч, цогцолборын барилгын ажлыг гүйцэтгэх сонирхолтой байна гэсэн санал тавьсан байдаг. Уг саналыг НИТХ-ын Тэргүүлэгчдийн хурлаар хэлэлцэж, барилгын ажил хийх тогтоол гаргаснаар шинэ төвийн барилгын ажил эхэлсэн. Энэ талаар Шинэ яармаг бүтээн байгуулалт нэгдлийн захирал Ч.Батзориг “Үндэсний таван компани нийлж “Яармаг шинэ нэгдэл”-ийг байгуулсан. Нэгдэл туслан гүйцэтгэгч 30 гаруй компанитай. Бид түүхэн барилга гэдэг утгаараа компанийн эзэмшлийн газраас зам дагуу 5 га-г чөлөөлж, нийгмийн хариуцлагаа биелүүлэх үүднээс нийслэлийн шинэ төвийн бүтээн байгуулалтад оролцож байна” гэдгээ хэлж байсан юм.

Нийслэлийн төр захиргааны байгууллагуудаар өдөрт дунджаар 5700 иргэн, аж ахуйн нэгжид 332 нэр төрлийн үйлчилгээ үзүүлдэг. Хотын төв рүү хоногт дунджаар 200 мянга орчим авто машин зорчдог байна. Хотын захиргаа Яармаг руу нүүснээр дээрх ачаалал тодорхой хувиар буурна гэж үзжээ.

Нэг дэнжид баригдаж буй хоёр барилгын ажлын явц ийм байна. Ажлын явц байдалтай танилцаж явахдаа нэг зүйл тодоос тод санагдаж, бас харамсах сэтгэл төрснийг нуух юун. Өвлийн жавар эд тачигнах тэр өдрүүдэд төрөх эмнэлгээс сурвалжлага бэлтгэж явахдаа дөнгөж төрсөн нярай, ээж нар олноороо нэг өрөөнд багтаж ядан суугааг харсан юм. Орчин таагүй, олноороо байснаас нярайн өвчлөл их байсныг салбарынхан нь ч хэлсэн. Хэрвээ энэ эмнэлгийн санхүүжилтийг сэтгэл гарган тухай бүрт нь шийдэж өгсөн бол олон ээж, хүүхдийн эрүүл мэнд нэн тустай байхсан. Нийтийн эрх ашгийг нэгдүгээрт тавьж, хувийн эрх ашгаа хойш нь тавихыг дахин нэг сануулъя.