Өвөрхангай аймгийн Арвайхээр сумын нэгдүгээр цэцэрлэгийн багш Ц, Г нар нь хоёр настай хүүхдийг сандал дээр суулган скочоор сандалтай нь хүлж, 30минутсуулгаж, хүүхдийн эрхийг ноцтой зөрчсөн нь камерын хяналтаар илэрчээ. Сандал дээр хүлүүлсэн хүүхэд хүлээсээ тайлуулах гэж тийчилж аргаа баран уйлж байхад хоёр багш тоосон шинжгүй 30 гаруй минут дэргэд нь байгаад байгаа нь камерт бичигдэж үлдсэн байна.

Хүүхдийн эрхийг ноцтой зөрчсөн хоёр багшийг тус цэцэрлэгийн удирдлага ажлаас нь халах арга хэмжээ авчээ.

Энэ мэдээллийн талаар Өвөрхангай аймгийн Арвайхээр сумын Сургуулийн өмнөх боловсрол хариуцсан мэргэжилтэн н.Баярмаатай холбогдож тодруулахад “Ийм асуудал гарсан. Цэцэрлэгийн эрхлэгчтэй холбогдож мэдээлэл аваарай” гэв.

САНААТАЙГААР ХҮҮХДИЙГ ШИЙТГЭЖ СКОЧИДСОН АСУУДАЛ БАЙХГҮЙ

Ингээд Өвөрхангай аймгийн Арвайхээр сумын нэгдүгээр цэцэрлэгийн эрхлэгч н.Азбилэгтэй утсаар холбогдож зарим зүйлийг тодрууллаа.

-Танай цэцэрлэгийн багш хоёр настай хүүхдийг сандал дээр суулгаж скочоор сандалтай хүлсэн асуудал гарсан байна. Энэ хэрэг хэзээ болсон бэ?

-Аравдугаар сарын эхээр болсон. Хэвлэл мэдээллийн хэрэгслээр буруу мэдээлэл яваад байна. Скочоор хийсэн уяагаар хүүхдийг уясан байгаа. Санаатай скочидсон зүйл байхгүй. Тухайн хүүхэд их хөдөлгөөнтэй учраас багш нар хажуудаа суулгаж байгаад уясан байсан.

-Хэдэн настай хүүхэд вэ?

-Энэ жил шинээр цэцэрлэгт орсон хоёр настай.

-Хүүхдийг скочоор уясан асуудлыг та нар хэзээ мэдсэн вэ?

-Бид камераа хянаж байх үедээ мэдсэн. Санаатайгаар хүүхдийг шийтгэж скочидсон асуудал байхгүй.

-Хоёр багшийг ажлаас халсан гэсэн. Энэ үнэн үү?

-Хоёр багш хуулийнхаа дагуу хариуцлага хүлээж, ажлаас чөлөөлөгдсөн байгаа.

-Хүүхдийн ар гэрийнхэн камерын бичлэг харсан уу?

-Ар гэрийнхэн нь камерын бичлэгийг харсан. Ямар нэгэн гомдол гаргаагүй. Ар гэрийнхэн нь хүүхдийн хөдөлгөөнийг нь хорих зорилгоор уясан байна гэж байсан. Тухайн хүүхдийг гэртээ ч байнга уяатай байдаг гэдгийг хэлж байсан.

-Хүүхдийн биед бэртэл гэмтэл гарсан уу?

-Биед нь ямар нэгэн бэртэл гэмтэл байхгүй. Хүүхдийг санаатайгаар скочдож уясан асуудал бичлэг дээр нь байхгүй байгаа. Худлаа мэдээлэл гараад байгааг гайхаж байна. Энэ чинь байгууллагын нэр хүнд болон аймгийн боловсролын салбарын нэр хүндэд муугаар нөлөөлнө шүү дээ.