УИХ-ын гишүүн Б.Баттөмөр: Дубайн гэрээтэй холбоотойгоор тухайн үеийн Ерөнхий сайдын захирамжийг хүчингүй болгох талаар төрийн бус байгууллагын зүгээс шүүхэд нэхэмжлэл гаргасан. Үүний дагуу дөрвөн төрлийн шийдвэрийг хүчингүй болгосон байна.

Дубайн гэрээг байгуулаад үндсэндээ тав дахь жил рүүгээ орж байна шүү дээ. Энэ хугацаанд маш их хэмжээний ажил хийчихсэн байна. Үүний хажуугаар гэрээний хүрээнд Монгол Улсын хууль тогтоомжийг зөрчсөн зүйл байна уу гэвэл, тийм.

Анхнаасаа маш муу гэрээ болсон. Энэ гэрээний хүрээнд “Рио Тинто’’-гоос менежментийн баг томилсон байдаг. Ингээд менежментийн төлбөрт нийт борлуулалтын дүнгээс 6.5 хувийн төлбөр төлж байна. Энэ мэтээр одоо хүчин төгөлдөр, үйлчилж буй олон хууль, тогтоолыг зөрчсөн.

Тиймээс Д.Тэрбишдагваар ахлуулсан ажлын хэсгээс Дубайн гэрээг цуцлах нь зүйтэй гэх дүгнэлт гаргасан. Харин бидний зүгээс эхлээд ширээний ард суу, “Оюутолгой" төслийнхөнтэй хамтарч ажилла. Болохгүй бол гэрээг цуцал гэсэн үүрэг даалгавар өгсөн. Оюутолгойн гэрээг анх байгуулснаас хойш улсын төсөвт 2.5 их наяд төгрөгийн татвар оруулсан байдаг.

Энэ гэрээний хүрээнд Монгол Улсын хууль тогтоомжийн хэд хэдэн заалтыг зөрчиж, өгсөн үүрэг даалгаврыг хэрэгжүүлээгүй байна. Тиймээс үүнийг эргэж харъя. Цаашлаад Дубайн гэрээг цуцлах хүртэлх арга хэмжээ авах, мөн 2010 онд ТЭЗҮ-г өөрчилсөн байна. Өөрөөр хэлбэл, ямар хэмжээний зардал гарах, цаашлаад хэдий хэмжээний баялаг олборлох вэ гэдгийг нарийвчилж тооцоолох шаардлагатай байна. Нөгөөтэйгүүр байгаль орчинтой холбоотой асуудлыг цэгцлэх шаардлага бий.